Schindler's List

Schindler's List (Film 1993 – US & UK)

Producer & Director: Steven Spielberg

Genre: Biography / Drama / History

Language: English

Running Time: 195 minute.

സ്റ്റീവന്‍ സ്പില്‍ബര്‍ഗ് - ലോക സിനിമയിലെ ജീവിച്ചിരിക്കുന്ന അതികായകന്‍. സംവിധായകന്‍, തിരക്കഥാകൃത്ത്, നിര്‍മ്മാതാവ് എന്നീ നിലകളില്‍ പ്രശസ്തന്‍. ഇദ്ദേഹത്തിന്റെ സയന്‍സ് ഫിക്ഷന്‍ സിനിമകളുടെ വിജയങ്ങള്‍ ഹോളിവുഡ് സിനിമ സങ്കല്‍പ്പങ്ങള്‍ക്ക് പുതിയ മാനങ്ങള്‍ നല്‍കി.ലോകത്തിലെ ഏറ്റവും സ്വാധീന ശക്തിയുള്ളതും ജനപ്രീതിയുള്ളതുമായ സംവിധായകന്‍. ഡ്രീം വര്‍ക്സ് എന്ന ലോകത്തിലെ പ്രധാന സിനിമ നിര്‍മ്മാണ കമ്പനിയുടെ ഉടമസ്ഥരില്‍ ഒരാള്‍. ജുറാസിക്‌ പാര്‍ക്ക്‌ എന്ന സിനിമയിലൂടെയാണ് സാധാരണക്കാരായ മലയാളികള്‍ക്കിടയില്‍ ഈ പേര് സജീവ സാന്നിധ്യമായത്.

Spielberg's timeless masterpiece

   നാസി ചെക്ക്‌ വ്യവസായി ആയ ഓസ്കര്‍ ഷിന്‍ലറുടെ ജീവിത കഥയാണ് 1993ല്‍ സ്പില്‍ബര്‍ഗ് സംവിധാനം ചെയ്ത Schindler’s List എന്ന സിനിമ. 1939ലെ രണ്ടാം ലോക മഹാ യുദ്ധമാണ് ഈ സിനിമയിലെ കഥയുടെ കാലഘട്ടം.നാസി പാര്‍ട്ടി അംഗം കൂടിയായ ഷിന്‍ലര്‍ ജര്‍മന്‍ പട്ടാളത്തിന് വേണ്ടി പളുങ്ക് പാത്രങ്ങളും  മറ്റും നിര്‍മ്മിക്കുന്ന ഒരു ഫാക്ടറി തുടങ്ങുക എന്ന ലക്ഷ്യത്തോടെയാണ് പോളണ്ടിലേക്ക് വരുന്നത്. ഇതിനുള്ള സൌകര്യങ്ങള്‍ക്കായി അവിടെയുള്ള ജര്‍മന്‍ പട്ടാളക്കാര്‍ക്ക് അകമഴിഞ്ഞ് കൈക്കൂലിയും മറ്റും ഷിന്‍ലര്‍ വാഗ്ദാനം ചെയ്യുന്നു. ഒപ്പം ജൂതനായ ഇട്സാക് സ്റ്റെന്‍ എന്ന ഒരു സഹായിയെയും ഒപ്പം കൂട്ടുന്നു. കുറഞ്ഞ കൂലിക്ക് ജൂതന്മാരായ തൊഴിലാളികളെ സംഘടിപ്പിക്കുക, അവിടെയുള്ള ലോക്കല്‍ ജൂത ബിസിനെസ്സുകാരുമായി ചങ്ങാത്തം കൂടുക എന്നതൊക്കെയാണ് സ്റ്റെന്നിനെ കൂടെ കൂട്ടാനുള്ള പ്രധാന കാരണം. ഫാക്ടറിയിലെ തൊഴിലാളികളെ കോണ്‍സന്‍ട്രേഷന്‍ ക്യാമ്പുകളില്‍ നിന്നും മറ്റും സംരക്ഷിക്കുന്നതിനായി സ്റ്റെന്‍, നാസി ബ്യുറോക്രസിക്ക് അത്യാവശ്യമായവര്‍ എന്ന ലിസ്റ്റില്‍ പെടുത്തി സംരക്ഷിക്കുന്നു. അമോന്‍ ഗോത് എന്ന ക്രൂരനായ പട്ടാളക്കാരന്‍ അവിടെ ഒരു ലേബര്‍ ക്യാമ്പ് നിര്‍മ്മിക്കുക എന്ന ദൌത്യമായി വരികയും അതിന്റെ ഭാഗമായി അനേകം ജൂതന്മാരെ കൊന്നൊടുക്കുകയും ചെയ്യുന്നു. ഇതെല്ലാം നേരിട്ട് കാണുന്ന ഷിന്‍ലര്‍ ആകെ അസ്വസ്ഥനാകുന്നു. സ്റ്റെന്‍ മുഖാന്തരം കൈക്കൂലി വാഗ്ദാനം ചെയ്തു ഷിന്‍ലര്‍ ഗോത്തുമായി ചങ്ങാത്തത്തില്‍ ആകുന്നു. അതിലൂടെ തൊഴിലാളികള്‍ക്കായി പട്ടാളക്കാരുടെ കവര്‍ച്ചയില്‍ നിന്നും അവരെ രക്ഷിക്കുന്നതിനായി ഷിന്‍ലര്‍ മറ്റൊരു ക്യാമ്പ് നിര്‍മ്മിക്കുന്നു.  പിന്നീട് അവിടെ നിന്നുള്ള സൈന്യത്തിന്‍റെ പിന്മാറ്റത്തിന്‍റെ ഭാഗമായി ബെര്‍ലിനില്‍ നിന്നുള്ള ആജ്ഞ പ്രകാരം ഗോത്, ചേരിയില്‍ കൊല്ലപ്പെട്ട ആയിരത്തിലധികം ജൂതന്മാരെ അവിടെ തന്നെ കത്തിക്കുകയും  മറ്റുള്ളവരെ ബെര്‍ലിനില്‍ എത്തിക്കാനുള്ള ശ്രമം തുടങ്ങുകയും ചെയ്യുന്നു. എന്നാല്‍ വളരെ പ്രധാനപ്പെട്ട തന്‍റെ ചില തൊഴിലാളികളെ സ്വന്തം ജന്മനാട്ടില്‍ തുടങ്ങുന്ന ഫാക്ടറിയിലേക്ക് കൊണ്ടുപോകുന്നതിനുള്ള സമ്മതം ഗോത്തില്‍ നിന്നും കൈക്കൂലിയിലൂടെ ഷിന്‍ലര്‍ സ്വന്തമാക്കുന്നു. അതിന്‍ പ്രകാരം ഷിന്‍ലറും സ്റ്റെന്നും കൂടി ഒരു ലിസ്റ്റ് ഉണ്ടാക്കുന്നു. ഇതാണ് പിന്നീട് Schindler’s list” എന്ന പേരില്‍ അറിയപ്പെട്ടത്. കുറച്ചു പേരെയെങ്കിലും ഈ ക്രൂരതകളില്‍ നിന്നും രക്ഷിക്കുക എന്ന ഉദ്ദേശ്യം കൂടി ഇതിനു പിന്നില്‍ ഉണ്ടായിരുന്നു.

   ലിയാം നീസന്‍ എന്ന ഐറിഷ് നടനാണ് ഷിന്‍ലര്‍ എന്ന കഥാപാത്രത്തെ വളരെ തന്മയത്വത്തോടെ അഭിനയിച്ചത്. ഒരുപാട് വിജയ ചിത്രങ്ങളില്‍ നീസന്‍ അഭിനയിച്ചിട്ടുണ്ട്. ഒരുപാട് പ്രധാന അവാര്‍ഡുകളും ഈ നടന്‍ സ്വന്തമാക്കിയിട്ടുണ്ട്. പ്രത്യേകിച്ച് ഈ സിനിമയില്‍. കൂടാതെ സ്റ്റെന്‍ എന്ന കഥാപാത്രത്തെ അവതരിപ്പിച്ചത് ഗാന്ധി എന്ന സിനിമയിലൂടെ പ്രശസ്തനായ നടന്‍ ബെന്‍ കിങ്സ്ലി ആണ്. പൂര്‍ണ്ണമായും ബ്ലാക്ക്‌ & വൈറ്റ് ആയാണ് ഈ സിനിമ ചിത്രീകരിച്ചിരിക്കുന്നത്. ലോകത്തിലെ മികച്ച 10 സിനിമകളില്‍ ഒന്നായി ഈ സിനിമയെ പരിഗണിക്കുന്നു. സംവിധായക മികവ് കൊണ്ടും സാങ്കേതിക മികവ് കൊണ്ടും അഭിനേതാക്കളുടെ കഴിവ് കൊണ്ടും സമ്പന്നമാണ് ഈ സിനിമ. മിക്കവാറും എല്ലാ വിഭാഗങ്ങളിലുമുള്ള ആ വര്‍ഷത്തെ പ്രധാന അവാര്‍ഡുകള്‍ ഈ സിനിമ നേടിയിട്ടുണ്ട്.

A perfect movie that deserves to be remembered

Trailer

I've Loved You So Long

Il y a longtemps que je t'aime (Film 2008-France)


Writer & Director: Philippe Claudel
Genre: Drama
Language: France

Running Time: 117 minute. 

        2008ല്‍ ഫ്രഞ്ച് സംവിധായകനായ ഫിലിപ്‌ ക്ലോടെല്‍ എഴുതി സംവിധാനം ചെയ്ത ഫ്രഞ്ച് ചലച്ചിത്രമാണ് I’ve Loved So Long. ജൂലിയറ്റ്‌, ലിയ എന്നീ രണ്ടു സഹോദരിമാരുടെ കഥയാണ് ഈ സിനിമ.

A human story intelligently revealing itself

    സ്വന്തം മകനെ കൊലപ്പെടുത്തിയ കുറ്റത്തിന് 15 വര്‍ഷത്തെ ജയില്‍ ശിക്ഷക്ക് ശേഷം ജൂലിയറ്റ്‌ തന്‍റെ ശിക്ഷയുടെ പ്രൊബേഷന്‍ കാലയളവില്‍ ലോറൈന്‍ എന്ന സ്ഥലത്ത് താമസിക്കുന്ന തന്‍റെ സഹോദരി ലിയയുടെയും കുടുംബത്തിന്‍റെയും അടുത്തേക്ക് പോകുന്നു. ലിയയുടെ ക്ഷണ പ്രകാരമാണ് ഇത്.  ഭര്‍ത്താവും ദത്തെടുത്ത രണ്ടു പെണ്മക്കളും സംസാര ശേഷി നഷ്ട്ടപ്പെട്ട ഭര്‍ത്താവിന്റെ അച്ഛനും ആണ് ആ വീട്ടില്‍ ഉള്ളത്. ലിയ അവിടെയുള്ള ഒരു യൂണിവേര്‍സിറ്റിയിലെ സാഹിത്യ അധ്യാപികയാണ്. എല്ലാവരും ഒറ്റപ്പെടുത്തിയ ജയില്‍ വാസ കാലയളവ് ജൂലിയറ്റിനെ അന്തര്‍മുഖിയും തികഞ്ഞ ഏകാകിയും ആക്കി മാറ്റിയിരുന്നു. സ്വന്തം മകനെ കൊലപ്പെടുത്തി എന്നത് കൊണ്ട് തന്നെ മാതാപിതാക്കളും ജൂലിയറ്റിനെ ഉപേക്ഷിക്കുകയും ലിയയെ ജൂലിയറ്റില്‍ നിന്നും അകത്തി നിറുത്തുകയും ചെയ്തിരുന്നു. അത് കൊണ്ട് തന്നെ ലിയയുടെ ഭര്‍ത്താവായും കുട്ടികളായും ഇടപഴുകാന്‍ ജൂലിയറ്റിനു കഴിയുന്നില്ല. പ്രൊബേഷന്‍ സമയത്തെ എല്ലാ ആഴ്ചയിലും ജൂലിയറ്റിനു പോലിസ്‌ സ്റ്റേഷനില്‍ ചെന്ന് ഒപ്പ്‌ രേഖപ്പെടുത്തെണ്ടതുണ്ട്. ജീവിതം മുന്നോട്ടു കൊണ്ട് പോകാന്‍ ഒരു ജോലിയും അത്യാവശ്യമായിരുന്നു.അതിനിടയില്‍ അച്ചന്‍ മരിച്ചു പോയ വിവരവും അമ്മ ഓര്‍മ്മ ശക്തി നഷ്ട്ടപ്പെട്ട് ആരെയും തിരിച്ചറിയാനാകാത്ത വിധം ഒരു ഹോസ്പിറ്റലില്‍ ഉണ്ടെന്നും ലിയ പറഞ്ഞു അറിയുന്നു. ദിവസങ്ങള്‍ കഴിയുന്തോറും വീട്ടുകാരുമായും അവരുടെ സുഹൃത്തുക്കളുമായും ജൂലിയറ്റ്‌ കൂടുതല്‍ അടുക്കുന്നു. അതിനിടയില്‍ ആണ് ലിയ ജൂലിയറ്റിന്‍റെ കൊലപാതകത്തിന്‍റെ കാരണം അറിയുന്നത്. പ്രേക്ഷകര്‍ ആകാംക്ഷപൂര്‍വ്വം കാത്തിരുന്ന ഒരു ക്ലൈമാക്സ്‌ ആയിരുന്നു അത്. 

   ജൂലിയറ്റിന്‍റെ കുറ്റകൃത്യത്തിന്‍റെ കാരണങ്ങളിലെക്കാണ് ഈ ചിത്രം പ്രേക്ഷകരെ സസ്പെന്‍സിന്‍റെ മുള്‍ മുനയില്‍ നിറുത്തി കൊണ്ട് പോകുന്നത്. ജയില്‍ വാസം 15 വര്‍ഷമായിരുന്നു എന്നും, അതൊരു കൊലപാതകം ആയിരുന്നു എന്നും, 6 വയസ്സുള്ള സ്വന്തം മകനെയാണ് കൊന്നത് എന്നും ഓരോര ഘട്ടങ്ങളില്‍ പ്രേക്ഷകരെ മനസ്സിലാക്കി കൊടുക്കുന്നു. അതിന്റെ കാരണം  വെളിപ്പെടുത്തുന്നതോടെ സിനിമ അവസാനിക്കുന്നു.

   ഈ സിനിമയുടെ പ്രധാന ആകര്‍ഷണം ജൂലിയറ്റ്‌ എന്ന കഥാ പാത്രത്തെ അവതരിപ്പിച്ച ക്രിസ്റ്റിന്‍ സ്കോട്ട് തോമസ്‌ എന്ന നടിയുടെ ഉജ്ജ്വല പ്രകടനം തന്നെയാണ്. മനസ്സിനെ ആഴത്തില്‍ സ്പര്‍ക്കുന്നതില്‍ ഈ സിനിമയെ ഈ നടിയുടെ പ്രകടനം നല്ലൊരു പങ്കാണ്‌ വഹിച്ചിരിക്കുന്നത്. ആ വര്‍ഷത്തെ മികച്ച നടിക്കുള്ള ഒരു പാട് അവാര്‍ഡുകള്‍ ഈ നടിക്ക് ലഭിക്കുകയുണ്ടായി. ലോക സിനിമയിലെ ശക്തമായ സ്ത്രീ കഥാപാത്രങ്ങളിലൊന്നായി മാറി ജൂലിയറ്റ്‌. പശ്ചാത്തല സംഗീതവും ചായഗ്രഹണവും എടുത്തു പറയേണ്ട ഒന്നാണ്.

A powerful film with wonderful performances, a masterful screenplay, and near perfect direction by Claudel.

Trailer

Life Is Beautiful

La vita è bella (Film 1997-Italy)

Writer & Director: Roberto Benigni
Genre: Comedy / Drama / Romance
Language: Italian / German / English
Running Time: 116 minute

   മുമ്പ് പല ചിത്രങ്ങള്‍ സംവിധാനം ചെയ്യുകയും അഭിനയിക്കുകയും ചെയ്തിട്ടുണ്ടെങ്കിലും ഈ ഒരൊറ്റ ചിത്രം ലോക സിനിമ ചരിത്രത്തില്‍ രോബെര്‍ടോ ബെഞ്ചിനിക്ക് നേടിക്കൊടുത്ത പ്രശസ്തി ചെറുതൊന്നുമല്ല. അദ്ദേഹം ഇറ്റലിയില്‍ അറിയപ്പെടുന്ന എഴുത്തുകാരനും നല്ലൊരു കൊമേഡിയനും കൂടിയായിരുന്നു. റോബര്‍ട്ടോയുടെ അച്ചന്‍റെ അനുഭവങ്ങളില്‍ നിന്നാണ് അദ്ദേഹം ഈ കഥ രൂപപ്പെടുത്തിയെടുത്തത്.

A heartbreaking tale told with love

    1939ല്‍ ജൂവിഷ്‌ ഇറ്റലിയനായ ഗൈഡോ ഒരെഫിസ്‌ ഇറ്റലിയിലെ ആരെസോയില്‍ എത്തുന്നത് ഒരു ബുക്ക്‌ ഷോപ്പ് തുടങ്ങുന്നതിനു വേണ്ടിയാണ്. അതെ സമയം തന്നെ ഗൈഡോയുടെ അമ്മാവന്‍ ജോലി ചെയ്യുന്ന ഒരു ഹോട്ടലില്‍ ഒരു വെയ്റ്റരുടെ ജോലിയും ചെയ്യുന്നുണ്ട്. പട്ടണത്തില്‍ വെച്ച് ഇറ്റലിയിലെ ഒരു സമ്പന്ന കുടുംബത്തിലെ അംഗമായ ഡോറ എന്ന സ്കൂള്‍ ടീച്ചറുമായി അടുപ്പത്തിലാകുന്നു. ഗൈഡോയുടെ നിഷ്ക്കളങ്കതയും നര്‍മ്മ ബോധവും ആണ് മറ്റൊരാളുമായി കല്യാണം നിശ്ചയിച്ചിരുന്ന ഡോറയെ ഗൈഡോയുമായി അടുപ്പിക്കുന്നത്. വിവാഹിതരാകുന്ന ഗൈഡോക്കും ഡോറക്കും ഒരു മകന്‍ പിറക്കുന്നു ജോഷ്വ. ജോഷ്വക്ക് അഞ്ചു വയസ്സാകുമ്പോഴേക്കും രണ്ടാം ലോക മഹായുദ്ധം അതിന്റെ മൂര്‍ദ്ധന്യാവസ്ഥയില്‍ എത്തിയിരുന്നു. ജുവിഷ്ക്കാരനായതിനാല്‍ ഗൈഡോയെയും ജോഷ്വായെയും അമ്മാവനെയും ജര്‍മന്‍ പട്ടാളക്കാര്‍ ലേബര്‍ ക്യാമ്പിലേക്ക് കൊണ്ട് പോകുന്നു. അവരെ വിട്ടു പിരിയാനാകാത്ത ഡോറയും നിര്‍ബന്ധപൂര്‍വ്വം അവരുടെ കൂടെ പോകുന്നു. എന്നാല്‍ സ്ത്രീകളുടെ ക്യാമ്പിലാണ് ഡോറയെ താമസിപ്പിക്കുന്നത്. അവിടെ അവര്‍ക്ക് പരസ്പരം കണ്ടു മുട്ടാന്‍ കഴിയുന്നില്ല.പട്ടാളക്കാരുടെ ഈ ഭീകരതയില്‍ നിന്നും ജോഷ്വോയുടെ ശ്രദ്ധ തിരിക്കാനായി ഗൈഡോ, ഇവിടെ ഒരു മത്സരമാണ് നടക്കുന്നതെന്നും അതിന്‍റെ ഭാഗമായാണ് അവര്‍ അവിടെ താമസിക്കുന്നതെന്നും പറഞ്ഞു മനസ്സിലാക്കുന്നു. അവിടെ നടക്കുന്ന ഓരോ സംഭവങ്ങള്‍ക്കും ഓരോരോ പോയിന്റ്‌ ഉണ്ടെന്നും അത് നേടി വിജയിക്കുന്നവര്‍ക്ക് പട്ടാള ടാങ്ക് സമ്മാനമായി കിട്ടും എന്നും പറയുന്നു. ഡോറയെ കണ്ടെത്തി എങ്ങനെയെങ്കിലും രക്ഷപ്പെടാനുള്ള തന്ത്രങ്ങളും ആലോചിക്കുന്നു ഗൈഡോ. ഇതാണ് ഈ സിനിമയുടെ കഥാ പശ്ചാത്തലം.

     അതി ഭാവുകത്വം നിറഞ്ഞ കോമെഡിയിലൂടെ ആണ് ഈ സിനിമ സഞ്ചരിക്കുന്നത്. പ്രേക്ഷകരെ മനസ്സ് നിറഞ്ഞു രസിപ്പിക്കുന്ന ബെഞ്ചിനിയുടെ അഭിനയ പാടവം അനിര്‍വചനീയമാണ്. ചിത്രത്തില്‍ ഡോറയായി അഭിനയിച്ചിരിക്കുന്നത് അദ്ദേഹത്തിന്റെ ഭാര്യ തന്നെയാണ്. ആദ്യാവസാനം നര്‍മ്മത്തില്‍ നമ്മളെ ആനന്ദിപ്പിക്കുമ്പോളും മനസ്സില്‍ ഒരു തേങ്ങല്‍ ബാക്കി നിറുത്തിയാണ് ഈ സിനിമ അവസാനിക്കുന്നത്. അത് തന്നെയാണ് ഈ സിനിമയുടെ വിജയവും. 

       1999 ലെ മികച്ച വിദേശ ഭാഷാചിത്രം, മികച്ച നടന്‍ എന്നീ ഓസ്കാര്‍ അവാര്‍ഡ് ഉള്‍പടെ റോബര്‍ട്ടോ ബെഞ്ചിനിക്ക് നിരവധി പുരസ്കാരങ്ങള്‍ നേടിക്കൊടുത്ത ചിത്രം. ലോകത്തില്‍ ഏറ്റവും കൂടുതല്‍ പ്രേക്ഷകര്‍ കണ്ട സിനിമ എന്ന ഗണത്തിലേക്ക് ഈ സിനിമ പെട്ടതു ഈ സിനിമയുടെ ലാളിത്യം ഒന്ന് കൊണ്ട് തന്നെയാണ്.

A must see film - highly recommended.

Trailer

3 - Iron

Bin-Jip 

(Film 2004-South Korea / Japan)

Writer & Director: Kim Ki-duk

Genre: Drama / Romance

Language: Korean

Running Time: 88 minute.

കിം കി ഡുക് 

    അന്താരാഷ്‌ട്ര ചലച്ചിത്ര മേളകളിലെ അനിഷേധ്യ സാന്നിധ്യം. നിരവധി ബഹുമതികള്‍ ലഭിച്ച കൊറിയന്‍ സംവിധായക പ്രതിഭ. പച്ചയായ ജീവിത യാഥാര്‍ത്യ ബോധത്തോടെയുള്ള സിനിമകളാണ് കിം കി ഡുക്കിന്‍റെതു. 2004ല്‍ അദ്ദേഹം സംവിധാനം ചെയ്ത സിനിമയാണ് 3-Iron. 

The beauty of silence..

       ഇതൊരു കൊറിയൻ ചിത്രമാണ്. തായ്‌ സുക് എന്ന യുവാവിന്റെയും ഭർത്താവിന്റെ ക്രൂരതകൾക്ക് ഇരയാകേണ്ടി വന്ന സൻഹവ എന്ന യുവതിയുടെയും പ്രണയമാണ് കഥയുടെ ഇതിവൃത്തം. വത്യസ്തമായ കഥാ പശ്ച്ചാത്തലവും വളരെ കുറച്ചു മാത്രം ഉള്ള സംഭാഷണവും ആണ് ഈ സിനിമയുടെ പ്രത്യേകത . 

    യാതൊരു ജീവിത ലക്ഷ്യങ്ങളുമില്ലാതെ അലഞ്ഞു നടക്കുന്ന നായകന്‍റെ പ്രധാന വിനോദം ആൾതാമസമില്ലാത്ത വീടുകൾ കുത്തിത്തുറന്ന് ഉടമസ്ഥൻ വരുന്നത് വരെ ആ വീട്ടിൽ തങ്ങുക എന്നത് മാത്രമാണ്. ഒന്നും മോഷ്ടിക്കാറില്ല. അവിടെയുള്ള ഭക്ഷണമെല്ലാം കഴിച്ചു സുഖമായി താമസിക്കുക. എന്നാൽ ഇതിനുള്ള പ്രതിഫലമായി ആ വീട് വൃത്തിയാക്കുകയും വസ്ത്രങ്ങൾ അലക്കുകയും കേടായ വീട്ടുപകരണങ്ങൾ നന്നാക്കുകയും എല്ലാം ചെയ്തു കൊടുക്കുന്നു. ഇതിനിടയിൽ ഒരു വീട്ടില് വെച്ച്, ഭർത്താവിന്റെ ക്രൂര മർദ്ദനങ്ങൾക്കു ഇരയാകേണ്ടി വന്ന ഒരു യുവതിയുമായി അടുക്കുന്നു. തിരിച്ചു വന്ന ഭര്ത്താവിനെ ആക്രമിച്ച ശേഷം അവർ രണ്ടു പേരും ഒളിച്ചോടുന്നു. പിന്നീട് രണ്ടു പേരും കൂടി പല പല വീടുകളിൽ താമസിക്കുന്നതിനിടയിൽ ഒരിക്കൽ പോലിസ് പിടിയിലാകുന്നു. തുടർന്ന് അവരുടെ ജീവിതത്തിൽ ഉണ്ടാകുന്ന സംഭവങ്ങൾ ആണ് 3-Iron എന്ന പേരിലുള്ള ഈ കൊറിയൻ ചിത്രം. വളരെ കുറച്ചു മാത്രം സംഭാഷണങ്ങളെ ഉള്ളൂ ഈ ചിത്രത്തിൽ. നായകനും നായികയും പരസ്പരം പേര് പോലും ചോദിക്കുന്നില്ല. എന്നാൽ വളരെ മനോഹരമായി തന്നെ ഈ ചിത്രം ആസ്വദിക്കാനാകും. അഭിനേതാക്കളുടെയെല്ലാം അഭിനയത്തികവ് എടുത്തു പറയേണ്ട ഒന്ന് തന്നെയാണ്.ഒപ്പം ഛായഗ്രഹണവും പശ്ചാത്തല സംഗീതവും.

    

     തീര്‍ച്ചയായും കണ്ടിരിക്കേണ്ട മികച്ച ഏഷ്യൻ ചിത്രങ്ങളുടെ ഗണത്തിൽ പെടുത്താം ഈ സിനിമയെ. മികച്ച ചിത്രത്തിനും സംവിധായകനുമുള്ള ഒരുപാട് അവാര്‍ഡുകള്‍ ഈ സിനിമ നേടിയിട്ടുണ്ട്. നിരവധി അന്താരാഷ്‌ട്ര ചലച്ചിത്ര മേളകളില്‍ പ്രദര്‍ശിപ്പിച്ചിട്ടുണ്ട് ഈ സിനിമ. ഈ വരുന്ന ഡിസംബര്‍ ആറിന് തിരുവനന്തപുരത്ത് തുടങ്ങുന്ന പതിനെട്ടാമത് അന്താരാഷ്‌ട്ര ചലചിത്ര മേളയില്‍ ഇദ്ദേഹം പങ്കെടുക്കുന്നുണ്ട്.

One of the best romantic movies where silence doses all the talking!

Trailer

Dersu Uzala

Dersu Uzala (1975-Soviet Union – Japan)
Direction: Akira Kurosawa
Genre: Adventure, Biography & Drama
Running Time: 141 minute.
Language: Russian

അകിര കുറൊസാവ

    ചലച്ചിത്ര പ്രേമികള്‍ക്കിടയില്‍ വിശേഷണം ആവശ്യമില്ലാത്ത ഒരു സംവിധായക പ്രതിഭ. ജാപ്പനീസ് സംവിധായകനായ ഇദ്ദേഹം മുപ്പതോളം ചിത്രങ്ങളാണ് സംവിധാനം ചെയ്തിരിക്കുന്നത്. ഇവയെല്ലാം ലോക സിനിമ ചരിത്രത്തില്‍ ഇടം നേടിയവയും ഒരുപാട് ചര്‍ച്ചകള്‍ക്കും പഠനങ്ങള്‍ക്കും വിധേയമായവയുമാണ്. അതുകൊണ്ടൊക്കെ തന്നെയാണ് അദ്ദേഹം ലോക സിനിമ ചരിത്രത്തിലെ സ്വാധീന ശക്തിയായി മാറിയതും “നൂറ്റാണ്ടിന്‍റെ ഏഷ്യക്കാരന്‍” എന്ന ബഹുമതിക്ക് അര്‍ഹാനായതും.

Haunting Work Of Art

    1975ല്‍ റഷ്യ-ജപ്പാന്‍ സംയുക്ത സംരഭമായാണ് “ദര്‍സു ഉസാല” എന്ന ഈ ചിത്രം നിര്‍മ്മിച്ചിരിക്കുന്നത്. ജപ്പാന്‍ ഇതര ഭാഷകളിലെ കുറോസാവയുടെ ആദ്യത്തെ ചിത്രമാണ്. 70mm ഫിലിമില്‍ അദ്ദേഹം ചെയ്ത ഏക ചിത്രവും. ഇതൊരു സംഭവ കഥയാണ്. 

    ദേശ പര്യവേഷകനായ മിലിട്ടറി ക്യാപ്ടന്‍ ആര്‍സിനിയോവ്‌ കാട്ടിനുള്ളിലെ ഒരു കുഴിമാടം അന്വേഷിച്ചു നടക്കുന്നിടത്ത് നിന്നാണ് സിനിമ ആരംഭിക്കുന്നത്. അവിടെ നിന്നും ഫ്ലാഷ് ബാക്കില്‍ ആണ് സിനിമ സഞ്ചരിക്കുന്നത്. 1902ല്‍ ഉസൂറി പ്രദേശത്തെ വനാന്തരങ്ങളില്‍ സര്‍വേയുമായി ബന്ധപ്പെട്ടു സഞ്ചരിക്കുന്ന പട്ടാള സംഘത്തിലെ നായകനാണ് ആര്‍സിനിയോവ്‌. കൊടും തണുപ്പിലെ ഒരു രാത്രിയിലെ വിശ്രമ സമയത്ത് വേട്ടക്കാരനായ ദര്‍സു ഉസാല ഇവരെ കണ്ടു മുട്ടുന്നു. പിന്നീട് ഇവരുടെ വഴികാട്ടിയായി ദര്‍സു ഇവരോടൊപ്പം സഞ്ചരിക്കുന്നു. കാടിനെയും പ്രകൃതിയെയും അടുത്തറിയുന്ന ദര്‍സുവിന്‍റെ പ്രവൃത്തികള്‍ ഈ സംഘത്തെ ആശ്ച്ചര്യപ്പെടുത്തുകയും ദര്‍സു, ആര്‍സിനിയോവുമായി ചങ്ങാത്തം സ്ഥാപിക്കുകയും ചെയ്യുന്നു. പല അപകട ഘട്ടങ്ങളിലും ദര്‍സുവിന്‍റെ സമയോചിതമായ ഇടപെടലുകള്‍ ഈ സംഘത്തെ രക്ഷപ്പെടുത്തുന്നു. ഇവരെ ഒരു റയില്‍വേ ട്രാക്കിന്‍റെ അടുത്ത് എത്തിച്ച ശേഷം ദര്‍സു യാത്ര പറഞ്ഞു പോകുന്നു.

   1907ല്‍ ആര്‍സിനിയോവ്‌ മറ്റൊരു സംഘവുമായി സര്‍വേയുമായി ബന്ധപ്പെട്ടു സഞ്ചരിക്കുന്നു. യാദൃശ്ചികമായി വീണ്ടും ദര്‍സുവിനെ കണ്ടുമുട്ടുന്നു. പ്രായം അപ്പോളേക്കും ദര്‍സുവിന്‍റെ വേട്ടയാടാനുള്ള കഴിവിനെ തളര്‍ത്തിയിരുന്നു. ഈ യാത്രയുടെ അവസാനം ദര്‍സുവിനെ സ്വന്തം വീട്ടിലേക്കു കൊണ്ട് പോകുകയും എന്നാല്‍ നാഗരികതയുടെ ശീലങ്ങലുമായി ഒത്തുചേരാനാകാതെ ദര്‍സു അവിടെ നിന്നും മടങ്ങുന്നു.

   1975ലെ മികച്ച അന്യഭാഷാ ചിത്രത്തിനുള്ള ഓസ്കാര്‍ അടക്കം ഒരുപാട് അവാര്‍ഡുകള്‍ വാരിക്കൂട്ടി ഈ സിനിമ. മാക്സിം മുന്‍സുക് (ദര്‍സു ഉസാല), യുറി സോലോമിന്‍ (ആര്‍സിനിയോവ്‌) എന്നിവരാണ് പ്രധാന നടന്മാര്‍. ഇതിന്‍റെ തിരക്കഥ കുറോസവയുടെത് തന്നെയാണ്. 

   പ്രകൃതിയും മനുഷ്യനും തമ്മിലുള്ള ആത്മ ബന്ധത്തിന്‍റെ സുന്ദരമായ ഒരു ചലച്ചിത്രവിഷ്ക്കാരമാണ് ഈ ചിത്രം. പ്രകൃതിയെയും സിനിമയെയും പറ്റി കൂടുതല്‍ മനസ്സിലാക്കാന്‍ കുട്ടികള്‍ക്ക് ഈ ചിത്രം ഉപകാരപ്പെടും.

Watching Dersu Uzala is almost contemplating perfection.

Trailer