ILO ILO

Ilo Ilo (Film Singapore 2013)

Written & Directed by Anthony Chen

Starring : Chen Tianwen, Yeo Yann Yann, Angeli Bayani

Genre : Drama

Language : Tagalog / English

Running Time : 99 minute.

         സിങ്കപ്പൂര്‍ സംവിധായകനായ ആന്‍റണി ചെന്‍ സംവിധാനം 2013ല്‍ ചെയ്ത സിനിമയാണ് ഇലോ ഇലോ. തന്‍റെ ആദ്യ മുഴു നീള ഫീച്ചര്‍ ഫിലിമായ ഈ ചിത്രം സംവിധാനം ചെയ്യുമ്പോള്‍ അദ്ദേഹത്തിന്‍റെ വയസ്സ് 30 മാത്രമായിരുന്നു. സിങ്കപ്പൂര്‍ സിനിമാ ചരിത്രത്തില്‍ ആദ്യമായി കാന്‍സ്‌ ഫിലിം ഫെസ്റ്റിവലില്‍ ഒരു അവാര്‍ഡ്‌ കിട്ടിയ ചിത്രമായിരുന്നു ഇത്. സംവിധാനത്തിന് പുറമേ രചനയും നിര്‍മ്മാണവും ചെന്‍ തന്നെയാണ് നിര്‍വഹിച്ചിരിക്കുന്നത്. പ്രേക്ഷക പ്രശംസകള്‍ ഏറ്റു വാങ്ങിയ ധാരാളം ഹ്രസ്വചിത്രങ്ങളും അദ്ദേഹം മുമ്പ് സംവിധാനം ചെയ്തിട്ടുണ്ട്.

       തൊണ്ണൂറുകളുടെ കാലഘട്ടത്തില്‍ ഏഷ്യയില്‍ സംഭവിച്ച സാമ്പത്തിക ഞെരുക്കം ഒരു സാധാരണ സിങ്കപ്പൂര്‍ കുടുംബത്തെ എങ്ങനെ ബാധിക്കുന്നു എന്നതാണ് ഈ ചിത്രത്തിന്‍റെ ഇതിവൃത്തം. തന്‍റെ തന്നെ ജീവിതത്തിലെ അനുഭവത്തില്‍ നിന്നാണ് സംവിധായകന്‍ ഈ കഥ തിരഞ്ഞെടുത്തത്. ഉദ്യോഗസ്ഥരായ ഭര്‍ത്താവും (ടെക്), ഗര്‍ഭിണിയായ ഭാര്യയും (ലെങ്ങ്), 10 വയസ്സുകാരന്‍ മകനും (ജിയാലെ) മാത്രമുള്ള ലെങ്ങ് കുടുംബത്തിലേക്ക് കടന്നു വരുന്ന ടെറി എന്ന ഫിലിപ്പിനോ വീട്ടു ജോലിക്കാരിയും ആണ് ഇതിലെ പ്രധാന കഥാ പാത്രങ്ങള്‍. വികൃതി കൂടുതലുള്ള ജിയാലിന് തുടക്കത്തില്‍ ടെറിയുമായി പൊരുത്തപ്പെട്ടു പോകാന്‍ കഴിയുമായിരുന്നില്ല. എന്നാല്‍ വീട്ടുകാരില്‍ നിന്നും കിട്ടുന്ന പരിഗണനയും സാഹചര്യവും ടെറിയെ അവിടെ തന്നെ പിടിച്ചു നിറുത്തുന്നു. ആയിടക്കു വന്നുപെട്ട സാമ്പത്തിക മാന്ദ്യം എല്ലാ സാധാരണക്കാരെയും പോലെ ലിങ്ങ് കുടുംബത്തെയും സാരമായി ബാധിക്കുന്നു. ഇത്തരം സന്ദര്‍ഭങ്ങളിലൂടെയാണ് കഥ സഞ്ചരിക്കുന്നത്.

        പ്രവചനാതീതമായ ഒരു സാധാരണ കഥ; അതിന്‍റെ ലാളിത്യം കൊണ്ടും സ്വാഭാവികമായ അവതരണ രീതി കൊണ്ടും ഈ ചിത്രം ഹൃദ്യമായ ഒരു അനുഭവമായി മാറുകയായിരുന്നു. തൊണ്ണൂറുകളുടെ കാലഘട്ടത്തെ അടയാളപ്പെടുത്തുന്നതിനു സാധാരണ അവലംബിക്കാറുള്ള കളര്‍ ടോണുകളിലെ വത്യാസമോ, പ്രത്യേക ടൈറ്റിലുകളോ, വിവരണമോ ഒന്നും നല്‍കിയിട്ടില്ല. ചിത്രത്തില്‍ ഇടയ്ക്കിടെ കാണിക്കുന്ന ഓഡിയോ കാസറ്റ്, ടൈപ്പ് റൈറ്റര്‍, പേജര്‍, വാക്മാന്‍ തുടങ്ങീ ചിഹ്നങ്ങളിലൂടെ കാലത്തെ ഓര്‍മ്മിപ്പിക്കുന്നു. സിങ്കപ്പൂര്‍ ടെലിവിഷന്‍ പരിപാടികളിലൂടെ സുപരിചിതനായ ചെന്‍ തിയാന്‍വെന്‍ ആണ് പ്രധാന നടനെ അവതരിപ്പിച്ചിരിക്കുന്നത്. ഗര്‍ഭിണിയായ ഭാര്യയായി അഭിനയിച്ച പ്രശസ്ത മലേഷ്യന്‍ മോഡലും നടിയും ആയ Yeo Yann Yann,  ഈ ചിത്രത്തില്‍ അഭിനയിക്കുന്ന സമയം 6  മാസം ഗര്‍ഭിണിയായിരുന്നു. (യഥാര്‍ത്ഥ പ്രസവ രംഗവും ഈ ചിത്രത്തിന്‍റെ അവസാനം കാണിക്കുന്നുണ്ട്) ഫിലിപ്പിനോ നടി ആഞ്ചലി ബയാനിയാണ് ടെറിയെ അവതരിപ്പിച്ചിരിക്കുന്നത്. ജിയാലിനു വേണ്ടി 2000ത്തിലധികം കുട്ടികളെ ഇന്‍റെര്‍വ്യു ചെയ്തപ്പോള്‍, ഒരേ സമയം പ്രേക്ഷകന് ഇഷ്ട്പ്പെടുകയും ദേഷ്യം തോന്നുകയും ചെയ്യുന്ന ഒരു മുഖമാണ് സംവിധായകന്‍ അന്വേഷിച്ചത്. കോ ജിയാ ലേര്‍ എന്ന കുട്ടിയിലാണ് ആ അന്വേഷണം ചെന്നെത്തിയത്. ഇത്രയും സമഗ്രമായ ഒരു കാസ്റ്റിംഗ് ഈ ചിത്രത്തെ പരിപൂര്‍ണ്ണതയില്‍ എത്താന്‍ സംവിധായകനെ ഒരുപാട് സഹായിച്ചിട്ടുണ്ട്. 

     2013 കാന്‍സ്‌ ഫിലിം ഫെസ്റ്റിവലിലാണ് ഈ ചിത്രം ആദ്യം പ്രദര്‍ശിപ്പിക്കുന്നത്. പ്രേക്ഷക ശ്രദ്ധയോടൊപ്പം ക്യാമറ ഡിയോണ്‍ അവാര്‍ഡും ഈ ചിത്രം അവിടെ വെച്ച് കരസ്ഥമാക്കുകയുണ്ടായി. കൂടാതെ ഒരുപാട് ഫിലിം ഫെസ്റ്റിവലുകളിലേക്ക് ഈ ചിത്രം തിരഞ്ഞെടുക്കുകയുണ്ടായി. 

A feel good movie.

Trailer : 

"Le passé" - THE PAST

"Le passé" - The Past (Film Iran /France 2013)

Written & Directed By : Azghar farhadi
Starring : Berenice Bejo, Ali Mosaffa, Tahar Rahim
Genre : Drama / Mystery
Language : French / Persian
Running Time : 130 Minute.

    അസ്ഗര്‍ ഫര്‍ഹാദി - ലോക സിനിമാ പ്രേമികളുടെ മനസ്സില്‍ വ്യക്തമായ ഒരിടം  കണ്ടെത്തിയ ഇറാനിയന്‍ സംവിധായകന്‍. ജനങ്ങള്‍ക്കിടയില്‍ സമ്മര്‍ദ്ദം ചെലുത്താന്‍ കഴിവുള്ള ലോകത്തിലെ 100 പ്രധാന വ്യക്തിത്വങ്ങളില്‍ ഒരാളായി 2012ല്‍ ടൈം മാഗസിന്‍ തിരഞ്ഞെടുത്ത വ്യക്തി. ടെഹ്‌റാന്‍ യൂനിവേഴ്സിടിയില്‍ നിന്നും Stage Directionല്‍ ബിരുദാനന്തര ബിരുദം എടുത്ത ശേഷം നാടക രചനയിലും ഹ്രസ്വ ചിത്രങ്ങളിലും കഴിവ് തെളിയിച്ചു. പിന്നീട് ചലച്ചിത്ര ലോകത്തില്‍ ചുരുങ്ങിയ ഏതാനും സിനിമകള്‍ കൊണ്ട് വ്യക്തി മുദ്ര പതിപിച്ചു. മനുഷ്യബന്ധങ്ങളുടെ ജീവിത ഗന്ധിയായ  ചലച്ചിത്രങ്ങള്‍ തികച്ചും സ്വാഭാവികതയോടെ അവതരിപ്പിക്കുന്നതില്‍ ഇറാനിയന്‍ സിനിമകള്‍ എന്നും പ്രേക്ഷകരെ അത്ഭുതപ്പെടുത്തിയിട്ടുണ്ട്. അത് കൊണ്ടാണ് മജീദി മജീദിയും, ജാഫര്‍ പനാഹിയും, മക്ബല്‍ ബഫും, അസ്ഗര്‍ ഫര്‍ഹാദിയും എല്ലാം മലയാളികളുടെ സിനിമ ചര്‍ച്ചകളില്‍ എന്നും സ്ഥാനം പിടിക്കുന്നത്‌. ഫര്‍ഹാദിയുടെ About Elly, A Separation എന്നീ ചിത്രങ്ങള്‍ എന്‍റെ ഇഷ്ട ചിത്രങ്ങളില്‍ വില മതിക്കാനാകാത്ത ശേഖരങ്ങളാണ്. 2013ല്‍ പുറത്തിറങ്ങിയ THE PAST എന്ന ചിത്രവും മുന്നോട്ട് വെക്കുന്നത് കുടുംബ ബന്ധത്തിന്‍റെ മൂല്യങ്ങള്‍ തന്നെയാണ്.

    A Seperation പോലെത്തന്നെ വൈവാഹിക ജീവിതത്തിലെ പൊരുത്തക്കേടുകള്‍ തന്നെയാണ് ഈ ചിത്രത്തിന്‍റെയും പ്രമേയം. പരാജയപ്പെട്ടു പോയ ആദ്യ വിവാഹത്തിനു ശേഷം മേരി അഹമ്മദിനെ വിവാഹം കഴിക്കുന്നു. ആദ്യ വിവാഹത്തിലെ രണ്ടു പെണ്‍കുട്ടികളും അവരോടൊപ്പം ആയിരുന്നു. രണ്ടു കുട്ടികള്‍ക്കും അഹമ്മദ് പിതൃ തുല്യമായ വാത്സല്യമായിരുന്നു നല്‍കിയിരുന്നത്. അമ്മയുടെ ജീവിത രീതികളോട് പൂര്‍ണ്ണമായും പൊരുത്തപ്പെടാന്‍ കഴിയാതിരുന്ന മൂത്ത മകള്‍ ലൂസിക്ക് എന്നും ഒരു ആശ്വാസം അഹമ്മദ് ആയിരുന്നു. ആ ദാമ്പത്യത്തിലും പൊരുത്തക്കേടുകള്‍ വന്നു തുടങ്ങിയതോടെ നാല് വര്‍ഷം മുന്‍പ് അഹമ്മദ് ഇറാനിലേക്ക് തിരച്ചു പോയി. 

    അഹമ്മദ് ഇപ്പോള്‍ ഫ്രാന്‍സിലേക്ക് തിരിച്ചു വന്നിരിക്കുന്നത്, വിവാഹമോചനം നിയമപരമാക്കണമെന്ന മേരിയുടെ നിര്‍ബന്ധത്തിനു വഴങ്ങിയാണ്. മേരി ഇതിനോടകം തന്നെ സമീര്‍ എന്നൊരു യുവാവുമായി പുതിയ ജീവിതം ആരംഭിച്ചു കഴിഞ്ഞു എന്ന് അവിടെയെത്തുന്ന അഹമ്മദ്‌ മനസ്സിലാക്കുന്നു. 10 വയസ്സുള്ള സമീറിന്‍റെ മകനും ഇപ്പോള്‍ അവരോടൊപ്പമാണ്. ആത്മഹത്യ ശ്രമത്തിനു ശേഷം അബോധാവസ്ഥയില്‍ ആശുപത്രിയില്‍ ആണ് സമീറിന്‍റെ ഭാര്യ. അമ്മയുടെ പുതിയ ബന്ധത്തെ ഉള്‍ക്കൊള്ളാനാകാതെ ലൂസി പലപ്പോഴും നേരം വൈകിയാണ് വീട്ടില്‍ എത്തുന്നത്. ഇത് മേരിയെ വല്ലാതെ വിഷമിപ്പിക്കുന്നുണ്ട്. ഈയൊരവസ്ഥയില്‍ നിന്നും ലൂസിയെ മാറ്റിയെടുക്കാനും അവളുടെ പ്രശ്നങ്ങളെ മനസ്സിലാക്കാനും മേരി അഹമ്മദിനോട് അഭ്യര്‍ഥിക്കുന്നു. ലൂസിയുടെ പ്രശ്നങ്ങളെ കണ്ടെത്താനുള്ള ശ്രമമാണ് The Past എന്ന സിനിമയുടെ ആധാരം. ഉദ്വെകജനകമായ ഒരു കഥാന്ത്യത്തിലേക്കാണ്‌ സിനിമ പിന്നീട് സഞ്ചരിച്ചു കൊണ്ടിരിക്കുന്നത്.

     

     The Past എന്ന ശീര്‍ഷകത്തെ അന്വര്‍ഥമാക്കുന്ന ഫ്ലാഷ് ബാക്കുകളോ ഒന്നും ഈ സിനിമയിലില്ല. വര്‍ത്തമാന കാലത്തില്‍ നിന്നും കൊണ്ട് തന്നെ ഭൂത കാലത്തെ കുറിച്ച് പ്രേക്ഷകന് വ്യക്തമാക്കി കൊടുക്കുന്നു ഈ ചിത്രം. ഇതിലെ ഓരോ കഥാ പാത്രങ്ങളും തമ്മിലുള്ള ബന്ധങ്ങള്‍ വരച്ചു കാണിക്കുന്നത് വത്യസ്തമായ വൈകാരിക തലങ്ങളില്‍ കൂടിയാണ്. സ്വാഭാവികത തീരെ ചോര്‍ന്നു പൊകാതെ അവയെല്ലാം പ്രേക്ഷക മനസ്സിലേക്ക് ഇറങ്ങിച്ചെല്ലുന്നു എന്നിടത്താണ് ഫിലിം മേക്കര്‍ എന്ന നിലയില്‍ ഫര്‍ഹാദിയുടെ വിജയം.

    പല സ്ഥലങ്ങളിലും അനുഭവപ്പെടുന്ന ഇഴച്ചില്‍ അഭിനേതാക്കളുടെ മികച്ച പ്രകടനം കൊണ്ട് മറികടക്കാന്‍ സംവിധായകന് കഴിഞ്ഞിട്ടുണ്ട്. മേരിയുടെ കഥാപാത്രത്തെ മനോഹരമായി അവതരിപ്പിച്ച Berenice Bejo എന്ന നടി തന്നെയാണ് അതില്‍ മുന്നിട്ടു നില്‍ക്കുന്നത്. ഈ ചിത്രത്തിലൂടെ അവരെ തേടിയെത്തിയ ബഹുമതികളും പ്രേക്ഷക പ്രശംസകളും തികച്ചും അര്‍ഹതപ്പെട്ടത് തന്നെ. കൂടാതെ അഹമ്മദ്, ലൂസി, സമീര്‍ എന്നീ കഥാ പാത്രങ്ങളെ അവതരിപ്പിച്ച  Ali Musaffa, Pauline Burlet, Tahar Rahim  എന്നിവരും കഥ പറച്ചിലിന്‍റെ സ്വാഭാവികത ഒട്ടും നഷ്ട്പ്പെടാതെ അവരുടെ ജോലി ഭംഗിയാക്കി. സമീറിന്‍റെ മകനായി അഭിനയിച്ച കുട്ടിയും ഗംഭീരമാക്കി. പശ്ചാത്തല സംഗീതം ഒരു ചിത്രത്തിനു പാടെ ഒഴിവാക്കാനാകാത്തതാണ് എന്ന ധാരണയെ ഈ ചിത്രം തിരുത്തിക്കുറിക്കുന്നു. ഒരു കുടുംബ ബന്ധത്തിന്‍റെ കഥ പറയുന്നതില്‍ ഒരു ക്യാമറമാന്‍റെയും എഡിറ്ററുടെയും കഴിവ് എന്താണ് എന്നതിന്‍റെ ഉദാഹരണം കൂടിയാകുന്നു  The Past. പലപ്പോഴും കുട്ടികള്‍ ഇറാനിയന്‍ സിനിമകളില്‍ ഒഴിച്ച്കൂട്ടാന്‍ കഴിയാത്ത വിധം അവിഭാജ്യ ഘടകങ്ങളാണ്. ഈ ചിത്രവും കുടുംബ ബന്ധങ്ങളുടെ അസ്വാരസ്യങ്ങള്‍ കുട്ടികളെ എങ്ങനെ ബാധിക്കുന്നു എന്ന് പറഞ്ഞു പോകുന്നു.

The Past തികച്ചും ഒരു സംവിധായകന്റെ കലയാണ്‌. A Seperation, About Elly  എന്നീ ചിത്രങ്ങളെ അപേക്ഷിച്ച് ഒരു പൂര്‍ണ്ണത കൈവരിക്കനായില്ലെങ്കിലും എന്ത് കൊണ്ടും കണ്ടിരിക്കാവുന്ന ഒരു സിനിമയാണിത്.

With its excellent story and heart felt acting....

If you have the patience and time, definitely its worth watching.

Trailer : 

Bom yeoreum gaeul gyeoul geurigo bom - Spring, Summer, Fall, Winter... and Spring

Bom yeoreum gaeul gyeoul geurigo bom -Spring, Summer, Fall, Winter... and Spring (Film Korea 2003)

Written and Directed by : Kim Ki-duk
Starring : Oh Yeong-su, Kim Young-min
Genre : Drama 

Language : Korean

Running Time : 103 minute

   മലയാളി പ്രേക്ഷകർക്കിടയിൽ വളരെ പ്രസിദ്ധിയാർജിച്ച വിശ്വോത്തര സംവിധായകനാണ് കിം കി-ഡുക്. അദ്ദേഹത്തിന്‍റെ ഏറ്റവും പ്രശസ്തമായ സിനിമകിളിൽ ഒന്നാണ് ഇത്. കേരളത്തിലേതടക്കമുള്ള ചലച്ചിത്ര മേളകളിൽ ഏറ്റവും കൂടുതൽ ആളുകൾ കാണാൻ ഇഷ്ട്പ്പെടുന്നത് ഇദ്ദേഹത്തിന്‍റെ  ചിത്രങ്ങളാണ്. 2003 ൽ കിം കി-ഡുക്‌ തന്നെ രചനയും സംവിധാനവും എഡിറ്റിങ്ങും നിർവഹിച്ച  ഈ ചിത്രം ഒരുപാട് പ്രശംസകൾ ഏറ്റു വാങ്ങിയിട്ടുണ്ട്. 

(Kim Ki-Duk in the film)

   കിം കി-ഡുക്‌ ഉൾപ്പടെ, കൈ വിരലിലെണ്ണാവുന്ന താരങ്ങളും ഒരൊറ്റ ലൊക്കേഷനും മാത്രമായി ഒട്ടും മടുപ്പിക്കാതെ വളരെ മനോഹരമായി ഈ ചിത്രം അണിയിച്ചൊരുക്കിയിരിക്കുന്നു.ഒരു സെൻ  ബുദ്ധ സന്യാസിയും അദ്ദേഹത്തിന്‍റെ ശിഷ്യനും ആണ്   ഇതിലെ കേന്ദ്ര കഥാപാത്രങ്ങൾ. ശിഷ്യന്‍റെ ബാല്യ കാലത്തിൽ നിന്ന് കൊണ്ട് തുടങ്ങുന്ന ഈ ചിത്രം പിന്നീട്ഒരു മനുഷ്യന്‍റെ ജീവിത കാലചക്രത്തിൽ സംഭവിക്കുന്ന പല പരിണാമങ്ങളും, ഓരോ കാലാവസ്ഥ വ്യതിയാനങ്ങളെ അടയാളപ്പെടുത്തി 5 അധ്യായങ്ങളിലായി ചിത്രീകരിച്ചിരിക്കുന്നു. 

   വലിയൊരു കാടിനകത്തുള്ള ഒരു തടാകവും അതിന്‍റെ നടുവിലായി ഒഴുകി നടക്കുന്ന ഒരു ബുദ്ധ ആശ്രമവും ആണ് ഈ സിനിമയുടെ പശ്ചാത്തലം. ആ ആശ്രമവും ഓരോ ഋതുഭേധങ്ങളിൽ അവിടുത്തെ അന്തേവാസികളായി എത്തുന്ന കോഴിയും പൂച്ചയും,അവിടുത്തെ തോണിയും കരയിലെ കവടാവും വലിയ മരവും എല്ലാം ഈ ചിത്രത്തിലെ പ്രധാന കഥാപാത്രങ്ങൾ തന്നെയാണ്. അങ്ങനെ പ്രകൃതി രമണീയമായ കഥാ പശ്ചാത്തലത്തിലൂടെ പ്രകൃതിയും മനുഷ്യനും തമ്മിലുള്ള ആത്മ ബന്ധത്തിന്‍റെ കൂടി കഥയാണിത്.

     

    ആദ്യ അധ്യാമായ സ്പ്രിങ്ങിൽ (വസന്തം) ബാല്യത്തിന്‍റെ നിഷ്ക്കളങ്കതയും കുസൃതികളും ആണ് പ്രതിപാതിക്കുന്നത്. രണ്ടാം അധ്യായമായ സമ്മറിൽ (ഹേമന്തം) കൗമാരത്തിന്‍റെ കൗതുകങ്ങളിലൂടെ സഞ്ചരിക്കുന്നു. ആശ്രമത്തിൽ ചികിത്സാർത്ഥം വരുന്ന ഒരു യുവതിയും ഈ അധ്യായത്തിൽ പ്രത്യക്ഷപ്പെടുന്നുണ്ട്. മൂന്നാം അധ്യായം ഫാൾ (ശിശിരം) മുന്നോട്ടു വെക്കുന്നത് യൗവ്വനത്തിന്‍റെ തീക്ഷണതയും മുൻകോപവും എല്ലാം ആണ്. നഗരത്തിലേക്ക് ഒളിച്ചോടി, തിരികെ വരുന്നതിലൂടെ നാഗരികതയുടെ കേട്ട് കാഴ്ചകളും പ്രകൃതിയിലേക്കുള്ള തിരിച്ചു പോക്കും വരച്ചു കാണിക്കുന്നു ഈ അധായം. തിരിച്ചറിവുകളുടെ ശരത് കാലവും; പിന്നീട് വീണ്ടും വരുന്ന വസന്തം, കാലചക്രത്തിന്‍റെ കറക്കത്തിൽ ഒരു തുടർച്ചയെന്നോണം മുന്നോട്ടുള്ള  ജീവിതത്തെയും പ്രേക്ഷകന് മുന്നിലെക്കെത്തിക്കുന്നു.

    ഈ ചിത്രം കണ്ടിറങ്ങുന്ന ഓരോ പ്രേക്ഷകനും എന്നും മനസ്സിൽ സൂക്ഷിക്കാൻ കഴിയുന്ന വളരെ മനോഹരമായ ചിത്രീകരണ ഭംഗി ഈ സിനിമ സമ്മാനിക്കുന്നു. പ്രകൃതിയെ  മനോഹരമായി ചിത്രീകരിച്ച മറ്റൊരു ചലച്ചിത്രം ഉണ്ടോ എന്ന് പോലും സംശയിച്ചു പോകും. ഒരൊറ്റ പശ്ചാത്തലമായിട്ടു പോലും പ്രേക്ഷകന് മടുപ്പോ ആവർത്തന വിരസതയോ നൽകാതെ വത്യസ്തമായ ഷോട്ടുകൾ ഈ ചിത്രത്തിന്‍റെ പ്രധാന ഘടകം തന്നെയാണ്. സംഭാഷണങ്ങളും പശ്ചാത്തല സംഗീതവും പരിമിതമായ തരത്തിലാണ് ഉപയോഗിച്ചിരിക്കുന്നതെങ്കിലും വളരെ ശക്തമായി പ്രേക്ഷകനുമായി സംവദിക്കുന്നു ഈ സിനിമ. പല രംഗങ്ങളുടെയും നിശബ്ദത ഒരു പാട് കാര്യങ്ങൾ പ്രേക്ഷകനോട്  വിളിച്ചോതുന്നുണ്ട്. ചിത്രത്തിന്‍റെ പൂർണ്ണതക്കു സാങ്കേതിക തികവിനോടൊപ്പം അഭിനേതാക്കൾ വലിയ പിന്തുണയാണ് നൽകിയിരിക്കുന്നത്.  

    ഈ ചിത്രത്തിനു ലോകമെമ്പാടും ലഭിച്ച സ്വീകാര്യതയും അംഗീകാരങ്ങളും അർഹതപ്പെട്ടത്‌ തന്നെയാണ്  എന്ന് ഈ ചിത്രം കണ്ടിറങ്ങുന്ന ഓരോ പ്രേക്ഷകനും സമ്മതിക്കും. കിം കി-ഡുക് എന്ന  സംവിധായകൻ വീണ്ടും വിസ്മയിപ്പിക്കുന്നു. (അദ്ദേഹത്തിന്‍റെ മറ്റൊരു ചിത്രമായ 3 - Iron നെക്കുറിച്ച് മറ്റൊരു പോസ്റ്റിൽ കുറിച്ചിട്ടുണ്ട്)

Season To Taste

Trailer :

Abril Despedaçado - Behind The Sun

Abril Despedaçado - Behind The Sun (Film : Brazil  2001)
Director : Walter Salles
Based on Broken April by Ismail Kadare
Starring : Rodrigo Santoro, Jose Dumond
Genre : Drama
Language : Portuguese
Running Time : 105 Minute

     2001ല്‍ വാള്‍ട്ടര്‍ സെല്ലെസ് സംവിധാനം ചെയ്ത പോര്‍ച്ചുഗീസ്‌ ഭാഷയിലുള്ള ബ്രസീല്‍ സിനിമയാണ് Behind The Sun. Broken April എന്ന നോവലിന്‍റെ ചലച്ചിത്രാവിഷ്ക്കാരം.വാള്‍ട്ടര്‍ സെല്ലസിന്‍റെ Motor Cycle Diaries എന്ന സിനിമയെ കുറിച്ച് മുന്‍പ് ഞാന്‍ പോസ്റ്റ്‌ ചെയ്തിരുന്നു.

   1910 കാലഘട്ടത്തിലെ ബ്രസീലിന്‍റെ വടക്ക്‌ പ്രദേശത്തെ ഒരു കാര്‍ഷിക ഗ്രാമമാണ് കഥ പശ്ചാത്തലം. 22 വയസ്സുള്ള ടോന്‍ഹൊ എന്ന യുവാവാണ് പ്രധാന കഥാപാത്രം. പഞ്ചസാരക്ക് വേണ്ടിയുള്ള കരിമ്പിന്‍ കൃഷി നടത്തുന്ന ടോന്‍ഹൊയുടെ കുടുംബവും ആ പ്രദേശത്തെ മറ്റൊരു കുടുംബവും കൃഷി ഭൂമിക്ക് വേണ്ടി പ്രതികാര ബുദ്ധിയോടെ വര്‍ഷങ്ങളായി നടത്തുന്ന പ്രതികാരത്തിന്‍റെ കഥയാണ് ഈ സിനിമ. കണ്ണിനു കണ്ണ്, ചോരക്കു ചോര എന്നതാണ് അവരുടെ രീതി. ഇതിന്‍റെ ഏറ്റവും അവസാന ഇരയായിരുന്നു ടോന്‍ഹൊയുടെ മൂത്ത സഹോദരന്‍. സഹോദരന്‍റെ ശവ സംസ്കാര ചടങ്ങുകളില്‍ നിന്നാണ് സിനിമ ആരംഭിക്കുന്നത്.

     കൊല്ലപ്പെട്ടയാളുടെ വസ്ത്രത്തിലെ ചോരയുടെ നിറം മഞ്ഞയാകുന്നത് വരെ അടുത്ത പ്രതികാരത്തിനായി കാത്തിരിക്കും അവര്‍. മനം മടുപ്പിക്കുന്ന ഈ പ്രതികാര രീതി അവസാനിക്കണമെന്ന ആഗ്രഹക്കാരനായിരുന്നു ടോന്‍ഹൊ. എന്നാല്‍ അച്ഛന്‍റെ നിര്‍ബന്ധത്തിനു വഴങ്ങി ടോന്‍ഹൊയും ചേട്ടന്‍റെ കൊലപാതകത്തിന് പ്രതികാരം ചെയ്യുന്നു.തുടര്‍ന്ന് രണ്ടാഴ്ചക്കുള്ളില്‍ അവര്‍  പ്രത്യാക്രമണം നടത്തുമെന്നും അത്  തന്‍റെ ജീവന് വേണ്ടിയുള്ളതായിരിക്കും എന്ന് മനസ്സിലാക്കുന്ന ടോന്‍ഹൊയുടെ മരണത്തിനു വേണ്ടിയുള്ള കാത്തിരിപ്പാണ് സിനിമ പറഞ്ഞു പോകുന്നത്. അച്ഛനും അമ്മയും ഇളയ സഹോദരനും അടങ്ങുന്നതാണ് ടോന്‍ഹൊയുടെ കുടുംബം. അതിനിടയില്‍ ടോന്‍ഹൊയുടെയും സഹോദരന്‍റെയും ജീവിതത്തിലേക്ക് കടന്നു വരുന്ന തെരുവ് സര്‍ക്കസ്‌ സംഘം അവരുടെ ജീവിതത്തില്‍ വഴിത്തിരിവാകുന്നു.ടോന്‍ഹൊയും സഹോദരനും തമ്മിലുള്ള സ്നേഹബന്ധം പ്രേക്ഷകരുടെ മനസ്സില്‍ ഒരു ഗൃഹാതുരത്വം ഉണര്‍ത്തുന്നുണ്ട്. ഇളയ സഹോദരന്‍റെ വിവരണത്തിലൂടെയാണ് സിനിമ സഞ്ചരിക്കുന്നത്. 

      തികച്ചും ലളിതമായ ഒരു കഥ, വളരെ ചുരുക്കം കഥാപാത്രങ്ങളിലൂടെ മനോഹരമായ ഒരു ചലച്ചിത്ര കാവ്യമാക്കാന്‍ സംവിധായകന് കഴിഞ്ഞിട്ടുണ്ട്. ആ തികവ് സിനിമയുടെ എല്ലാ ഘടകങ്ങളിലും പ്രേക്ഷകന് അനുഭവപ്പെടുന്നുണ്ട്. ചിത്രം അവശേഷിപ്പിക്കുന്ന നൊമ്പരം കുറച്ചു കാലത്തിനെങ്കിലും പ്രേക്ഷക മനസ്സില്‍ നിറഞ്ഞു നില്‍ക്കും.

Worth Watching...

Trailer :

INCENDIES

Incendies (Film -Canada 2010)

Director : Denis Villeneuve

Starring : Lubana Azabal, Melisa Desormeaux, Maxim Goudatte

Genre : Drama / Mistery / War

Language : French & Arabic

Running Time : 130 Minute.

       Denis Villeneuve, 2010ല്‍ സംവിധാനം ചെയ്ത കനേഡിയന്‍ ചിത്രമാണ് Incendies. ഇതേ പേരില്‍ തന്നെയുള്ള ഒരു നാടകത്തിന്‍റെ ചലച്ചിത്രാവിഷ്കാരമാണ് ഈ ചിത്രം. അമ്മയുടെ മരണ ശേഷം ഇരട്ട സഹോദരങ്ങളായ മക്കള്‍ അമ്മയുടെ ഭൂത കാലം അന്വേഷിച്ചുള്ള യാത്രയാണ് ഈ സിനിമ. ഉദ്വേകജനകമായ ഒരു കഥാന്ത്യം പ്രേക്ഷകരെ ശരിക്കും ഞെട്ടിക്കുക തന്നെ ചെയ്യും. ചലച്ചിത്ര നിരൂപകരില്‍ നിന്നും പ്രേക്ഷകരില്‍ നിന്നും ഒരുപാട് പ്രശംസ ഏറ്റു വാങ്ങിയ സിനിമയാണിത്.

    60 വയസ്സായ നവാല്‍ മര്‍വാന്‍ എന്ന മാതാവിന്‍റെ മരണത്തോടെയാണ് ഈ സിനിമ ആരംഭിക്കുന്നത്. ജീനെ മര്‍വാന്‍, സിമന്‍ മര്‍വാന്‍ എന്ന ഇരട്ടക്കുട്ടികളായിരുന്നു നവാലിനുണ്ടായിരുന്നത്. നവാലിന്‍റെ മരണ ശേഷം വക്കീല്‍, അവരുടെ വില്‍പത്രം മക്കളെ വായിച്ചു കേള്‍പ്പിക്കുന്നു. വളരെ വിചിത്രമായിരുന്നു ആ വില്‍പത്രം. ഈ വക്കീലിന്‍റെ സെക്രട്ടറി ആയിട്ടായിരുന്നു നവാല്‍ ജോലി ചെയ്തിരുന്നത്. നവാല്‍ വക്കീലിനെ ഏല്‍പ്പിച്ചിരുന്ന മൂന്നു കവറുകളില്‍ രണ്ടെണ്ണം മക്കളെ ഏല്‍പ്പിക്കുന്നു. അതില്‍ ഒന്ന് പശ്ചിമേഷ്യയിലെ യുദ്ധത്തിനിടെ മരണപ്പെട്ടു പോയി എന്ന് അവര്‍ വിശ്വസിക്കുന്ന അവരുടെ അച്ഛനെക്കുറിച്ച് അന്വേഷിക്കുവാനും മറ്റൊന്ന് അവരില്‍ നിന്നും ആ അമ്മ മറച്ചു വെച്ച അവരുടെ മൂത്ത സഹോദരനെ കണ്ടെത്തുവാനും. ഈ രണ്ടു കത്തുകളും അവര്‍ക്ക് അവിചാരിതം ആയിരുന്നു. ഈ രണ്ടു അന്വേഷനങ്ങളുടെയും അവസാനം മൂന്നാമത്തെ കവര്‍ വായിക്കാമെന്നും അത് വരെ അവരുടെ കുഴിമാടത്തില്‍ കല്ലറകളോ പേരോ വെക്കാന്‍ പാടില്ലായെന്നും നവാല്‍ കത്തിലൂടെ ആവശ്യപ്പെട്ടിരുന്നു. സിമണിനു ഇതൊന്നും അംഗീകരിക്കാനാകുന്നതായിരുന്നില്ല. എന്നാല്‍ അമ്മയുടെ അന്ത്യാഭിലാഷം സാധിക്കുന്നതിനായി സഹോദരി ജീനെ പുറപ്പെടുന്നു.

    ജീനെക്ക് അജ്ഞാതമായ ഒരു ഭൂതകാലത്തിലെക്കാണ് യാത്ര. അച്ഛനെയും തന്‍റെ അര്‍ദ്ധ സഹോദരനെയും അന്വേഷിച്ച്. യുദ്ധകലുഷിതമായ പശ്ചിമേഷ്യയിലെ ലെബനോനിലെക്കാണ് യാത്ര.അവര്‍ അത് വരെ അറിയാതിരുന്ന വരുടെ അമ്മയുടെ ഭൂതകാലം ജീനെയെ ഓരോ നിമിഷവും അത്ഭുതപ്പെടുത്തിക്കൊണ്ടിരുന്നു. പിന്നീട് ഈ യാത്രക്കിടയില്‍ സിമണും വക്കീലും ജീനെയുടെ ഒപ്പം കൂടുന്നു. ആ യാത്ര അവസാനിക്കുന്നത് ഒരു പക്ഷെ സിനിമാ ലോകം ഇന്ന് വരെ കൈകാര്യം ചെയ്തിട്ടില്ലാത്ത ഒരു കഥാന്ത്യത്തിലെക്കായിരുന്നു.

      ഭൂതകാലവും വര്‍ത്തമാന കാലവും സമന്വയിപ്പിച്ച് കൊണ്ട് വളരെ കൃത്യമായ രീതിയില്‍ പഴുതുകളില്ലാതെ ഈ സിനിമ സഞ്ചരിക്കുന്നു. ശക്തമായ തിരക്കഥയും സംവിധാന മികവും മറ്റു സാങ്കേതിക തികവും ഈ ചിത്രത്തെ നമുക്ക് പ്രിയപ്പെട്ടതാക്കുന്നു. യുദ്ധമുഖരിതമായ ഒരു കാലഘട്ടത്തിന്‍റെ കഥ പറയുമ്പോള്‍ യുദ്ധത്തിന്‍റെ ക്രൂരസ്വഭാവം മറന്നു കൊണ്ട് പോകാന്‍ കഴിയില്ല. Villeneuve  തന്‍റെ നിലപാടുകള്‍ അറിയിച്ചു കൊണ്ട് തന്നെയാണ് ഈ ചിത്രം ഒരുക്കിയിരിക്കുന്നത്. അമ്മയുടെ വേഷം അഭിനയിച്ച ബെല്‍ജിയന്‍ നടിയായ ലുബ്ന അസ്ബാലിന്‍റെ മികച്ച അഭിനയം കൂടുതല്‍ മിഴിവേകുന്നു.

A Brilliant Constructed & Disturbing Mystery.

Trailer :