സിനിമ...
ബാല്യത്തില്‍ കൗതുകമായിരുന്നു...
കൗമാരത്തില്‍ ആഘോഷമായി...
യൗവ്വനത്തില്‍ ചിന്തിപ്പിക്കാന്‍ തുടങ്ങി..
അന്ന് മുതല്‍ മനസ്സിലായി ഈ കലാരൂപത്തിന് ഭാഷയോ ദേശമോ ഒന്നും ഒരു തടസ്സമല്ലെന്ന്. അന്യ ദേശ ഭാഷാ സിനിമകളോട് ചങ്ങാത്തം കൂടിയത് അന്നാണ്. മനസ്സില്‍ പതിഞ്ഞത് ഇവിടെ കുറിക്കുന്നു. സലാം സിനിമ. (1995ല്‍ വിശ്വപ്രസിദ്ധ ഇറാനിയന്‍ സംവിധായകന് മൊഹ്സിന്‍ മഖ്ബാല്‍ബഫ് സംവിധാനം ചെയ്ത സിനിമയാണ് "സലാം സിനിമ")
ബിജാസ്‌ അറക്കല്‍.
Denis Villeneuve, 2010ല്‍ സംവിധാനം ചെയ്ത കനേഡിയന്‍ ചിത്രമാണ് Incendies. ഇതേ പേരില്‍ തന്നെയുള്ള ഒരു നാടകത്തിന്‍റെ ചലച്ചിത്രാവിഷ്കാരമാണ് ഈ ചിത്രം. അമ്മയുടെ മരണ ശേഷം ഇരട്ട സഹോദരങ്ങളായ മക്കള്‍ അമ്മയുടെ ഭൂത കാലം അന്വേഷിച്ചുള്ള യാത്രയാണ് ഈ സിനിമ. ഉദ്വേകജനകമായ ഒരു കഥാന്ത്യം പ്രേക്ഷകരെ ശരിക്കും ഞെട്ടിക്കുക തന്നെ ചെയ്യും. ചലച്ചിത്ര നിരൂപകരില്‍ നിന്നും പ്രേക്ഷകരില്‍ നിന്നും ഒരുപാട് പ്രശംസ ഏറ്റു വാങ്ങിയ സിനിമയാണിത്.
60 വയസ്സായ നവാല്‍ മര്‍വാന്‍ എന്ന മാതാവിന്‍റെ മരണത്തോടെയാണ് ഈ സിനിമ ആരംഭിക്കുന്നത്. ജീനെ മര്‍വാന്‍, സിമന്‍ മര്‍വാന്‍ എന്ന ഇരട്ടക്കുട്ടികളായിരുന്നു നവാലിനുണ്ടായിരുന്നത്. നവാലിന്‍റെ മരണ ശേഷം വക്കീല്‍, അവരുടെ വില്‍പത്രം മക്കളെ വായിച്ചു കേള്‍പ്പിക്കുന്നു. വളരെ വിചിത്രമായിരുന്നു ആ വില്‍പത്രം. ഈ വക്കീലിന്‍റെ സെക്രട്ടറി ആയിട്ടായിരുന്നു നവാല്‍ ജോലി ചെയ്തിരുന്നത്. നവാല്‍ വക്കീലിനെ ഏല്‍പ്പിച്ചിരുന്ന മൂന്നു കവറുകളില്‍ രണ്ടെണ്ണം മക്കളെ ഏല്‍പ്പിക്കുന്നു. അതില്‍ ഒന്ന് പശ്ചിമേഷ്യയിലെ യുദ്ധത്തിനിടെ മരണപ്പെട്ടു പോയി എന്ന് അവര്‍ വിശ്വസിക്കുന്ന അവരുടെ അച്ഛനെക്കുറിച്ച് അന്വേഷിക്കുവാനും മറ്റൊന്ന് അവരില്‍ നിന്നും ആ അമ്മ മറച്ചു വെച്ച അവരുടെ മൂത്ത സഹോദരനെ കണ്ടെത്തുവാനും. ഈ രണ്ടു കത്തുകളും അവര്‍ക്ക് അവിചാരിതം ആയിരുന്നു. ഈ രണ്ടു അന്വേഷനങ്ങളുടെയും അവസാനം മൂന്നാമത്തെ കവര്‍ വായിക്കാമെന്നും അത് വരെ അവരുടെ കുഴിമാടത്തില്‍ കല്ലറകളോ പേരോ വെക്കാന്‍ പാടില്ലായെന്നും നവാല്‍ കത്തിലൂടെ ആവശ്യപ്പെട്ടിരുന്നു. സിമണിനു ഇതൊന്നും അംഗീകരിക്കാനാകുന്നതായിരുന്നില്ല. എന്നാല്‍ അമ്മയുടെ അന്ത്യാഭിലാഷം സാധിക്കുന്നതിനായി സഹോദരി ജീനെ പുറപ്പെടുന്നു.
ജീനെക്ക് അജ്ഞാതമായ ഒരു ഭൂതകാലത്തിലെക്കാണ് യാത്ര. അച്ഛനെയും തന്‍റെ അര്‍ദ്ധ സഹോദരനെയും അന്വേഷിച്ച്. യുദ്ധകലുഷിതമായ പശ്ചിമേഷ്യയിലെ ലെബനോനിലെക്കാണ് യാത്ര.അവര്‍ അത് വരെ അറിയാതിരുന്ന വരുടെ അമ്മയുടെ ഭൂതകാലം ജീനെയെ ഓരോ നിമിഷവും അത്ഭുതപ്പെടുത്തിക്കൊണ്ടിരുന്നു. പിന്നീട് ഈ യാത്രക്കിടയില്‍ സിമണും വക്കീലും ജീനെയുടെ ഒപ്പം കൂടുന്നു. ആ യാത്ര അവസാനിക്കുന്നത് ഒരു പക്ഷെ സിനിമാ ലോകം ഇന്ന് വരെ കൈകാര്യം ചെയ്തിട്ടില്ലാത്ത ഒരു കഥാന്ത്യത്തിലെക്കായിരുന്നു.
ഭൂതകാലവും വര്‍ത്തമാന കാലവും സമന്വയിപ്പിച്ച് കൊണ്ട് വളരെ കൃത്യമായ രീതിയില്‍ പഴുതുകളില്ലാതെ ഈ സിനിമ സഞ്ചരിക്കുന്നു. ശക്തമായ തിരക്കഥയും സംവിധാന മികവും മറ്റു സാങ്കേതിക തികവും ഈ ചിത്രത്തെ നമുക്ക് പ്രിയപ്പെട്ടതാക്കുന്നു. യുദ്ധമുഖരിതമായ ഒരു കാലഘട്ടത്തിന്‍റെ കഥ പറയുമ്പോള്‍ യുദ്ധത്തിന്‍റെ ക്രൂരസ്വഭാവം മറന്നു കൊണ്ട് പോകാന്‍ കഴിയില്ല. Villeneuve തന്‍റെ നിലപാടുകള്‍ അറിയിച്ചു കൊണ്ട് തന്നെയാണ് ഈ ചിത്രം ഒരുക്കിയിരിക്കുന്നത്. അമ്മയുടെ വേഷം അഭിനയിച്ച ബെല്‍ജിയന്‍ നടിയായ ലുബ്ന അസ്ബാലിന്‍റെ മികച്ച അഭിനയം കൂടുതല്‍ മിഴിവേകുന്നു.
Distribution : National Geographic Entertainer, BBC Film & UK Film Council
Starring : Oliver Litondo, Naomie Harris
Genre : Biography / Drama
Language : English
Running Time : 103 minute
2010ല്‍ Justin Chadwick സംവിധാനം ചെയ്ത വളരെ സാമൂഹിക പ്രസക്തിയുള്ള ഒരു സിനിമയാണ് The First Grader. കിമാനി മറുഗെ എന്ന കെനിയന്‍ വിപ്ലവകാരിയുടെ 84-മത്തെ വയസ്സില്‍ നടന്ന മറ്റൊരു പോരാട്ടത്തിന്‍റെ ചലച്ചിത്രാവിഷ്ക്കാരം. ബ്രിട്ടീഷ്‌ പട്ടാളത്തിനെതിരെ തന്‍റെ ജനതയ്ക്ക് വേണ്ടി യൗവ്വനം ത്യജിച്ച മറുഗെ, ജീവിത സായാഹ്നത്തില്‍ എഴുതാനും വായിക്കാനും പഠിക്കാന്‍ തനിക്ക് കിട്ടിയ അവസാന അവസരം പ്രയോജനപ്പെടുത്താന്‍ ഇറങ്ങുമ്പോള്‍ അത് മറ്റൊരു ചരിത്രം ആകുകയായിരുന്നു. വിദ്യാഭ്യാസത്തിന്‍റെ മൂല്ല്യം, നമുക്ക് വേണ്ടി നമുക്ക് മുന്നേ പോരാടിയവരുടെ ചരിത്രം എന്നിവയുടെ പ്രസക്തി ഈ ചിത്രം മുന്നോട്ട് വെക്കുന്നു.
Its Never Too Late to Dream.
കെനിയയിലെ ഒരു ഉള്‍നാടന്‍ ഗ്രാമവും അവിടുത്തെ ഒരു പ്രൈമറി സ്കൂളുമാണ് കഥാപശ്ചാത്തലം. 2003ല്‍ എല്ലാവര്‍ക്കും സൗജന്യ പ്രൈമറി വിദ്യാഭ്യാസം എന്ന ഗവണ്മെന്‍റ് ഉത്തരവ്‌ പത്രങ്ങളിലൂടെയും റെഡിയോയിലൂടെയും ആണ് ആ ഗ്രാമവാസികള്‍ അറിയുന്നത്. 84 വയസ്സുള്ള മറുഗെയും എഴുത്തും വായനയും അഭ്യസിക്കുന്നതിനായി സ്കൂളിലെ പ്രധാന അധ്യാപിക ജയിനിനെ സമീപിക്കുന്നു. എന്നാല്‍ ചെറിയ കുട്ടികള്‍ക്കൊപ്പം മറുഗെയെ പഠിക്കാന്‍ സഹ അദ്ധ്യാപകന്‍ സമ്മതിക്കുന്നില്ല. പലപല കാരണങ്ങള്‍ പറഞ്ഞു അയാള്‍ മറുഗെയെ പറഞ്ഞു വിടുന്നു. പ്രസിഡണ്ടിന്‍റെ കയ്യില്‍ നിന്നും തനിക്ക് കിട്ടിയ ഒരു പ്രധാന കത്തിന്‍റെ പൂര്‍ണ്ണരൂപം സ്വന്തമായി വായിച്ചു മനസ്സിലാക്കുക എന്നതാണ് അദ്ദേഹത്തിന്‍റെ ഈ പോരാട്ടത്തിന് പിന്നിലുള്ള പ്രധാന ലക്ഷ്യം. തന്‍റെ ശക്തമായ ആഗ്രഹം ജയിനിനെ പറഞ്ഞു ബോധ്യപ്പെടുത്തി സ്കൂളില്‍ പഠിക്കുന്നതിനുള്ള സമ്മതം നേടിയെടുക്കുന്നു. അങ്ങനെ ബുക്കുകളും യൂണിഫോമും എല്ലാമായി മറുഗെ സ്കൂളില്‍ പോയിത്തുടങ്ങുന്നു.
വിശ്രമ വേളകളില്‍ സ്വാതന്ത്രത്തിന്‍റെ വില തന്‍റെ അനുഭവങ്ങളില്‍ നിന്നും മറുഗെ കുട്ടികള്‍ക്ക് പറഞ്ഞ് കൊടുക്കുന്നു. എന്നാല്‍ പിന്നീട് രക്ഷിതാക്കള്‍ മറുഗെയുടെ സ്കൂള്‍ പ്രവേശനത്തിന്തിരെ തിരിയുന്നു. കാര്യങ്ങള്‍ വഷളാകുകയും മാധ്യമ ശ്രദ്ധ കൈവരികയും ചെയ്യുന്നു.ബ്രിട്ടീഷുകാര്‍ക്കെതിരെ മറുഗെ നടത്തിയ പോരാട്ടത്തിന്‍റെ വില മനസ്സിലാക്കിയ ജെയിന്‍, മറുഗെയുടെ അവകാശത്തിനു വേണ്ടി ഒപ്പം നില്‍ക്കുന്നു. ഇരുവരും പല പ്രതിസന്ധികളെയും നേരിടുന്നു. പേനയാണ് യഥാര്‍ത്ഥ ആയുധം എന്ന് മറുഗെ സമൂഹത്തോട് പ്രഖ്യാപിക്കുന്നു. ലോകത്തിലെ ഏറ്റവും പ്രായം കൂടിയ വിദ്യാര്‍ഥിയായി ഗിന്നസ്‌ ബുക്കില്‍ സ്ഥാനം പിടിച്ച മറുഗെ, പ്രത്യേക ക്ഷണിതാവായി വിദ്യാഭ്യാസത്തിന്‍റെ പ്രാധാന്യത്തെ കുറിച്ച് UNല്‍ പ്രസംഗിച്ചിട്ടുണ്ട്.
വിദ്യാഭ്യാസത്തിന്‍റെ യഥാര്‍ത്ഥ മൂല്യം പ്രേക്ഷകനിലേക്ക് ശരിക്കും പകര്‍ത്തിയെഴുതുന്നതില്‍ സംവിധായകന് വിജയിച്ചിട്ടുണ്ട്. ഒരു ഡോക്യുമെണ്ടറിയുടെ ശൈലിയാണ് ഈ ചിത്രം സ്വീകരിച്ചിരിക്കുന്നത്. മറുഗെയെ അവതരിപ്പിച്ച ഒലിവര്‍ ലിറ്റാണ്ടോയുടെ അഭിനയം എടുത്തു പറയേണ്ട ഒന്നാണ്. പ്രധാന നായികാ കഥാപാത്രത്തെ അവതരിപ്പിച്ച നവോമി ഹാരിസ്‌, "Pirates of Caribbeans" സീരീസുകളിലൂടെ പ്രശസ്തി നേടിയ നടിയാണ്.അതെ പോലെ തന്നെ ഒരു സിനിമയോ ടെലിവിഷനോ പോലും കണ്ടിട്ടില്ലാത്ത കുട്ടികളാണ് ഇതിലെ സ്കൂള്‍ കുട്ടികളുടെ വേഷം വളരെ രസകരമായി അഭിനയിച്ചിരിക്കുന്നത്.
വളരെ ഹൃദയസ്പര്‍ശിയായ ഈ ചിത്രം അറിവ് നേടുന്നതിനു വേണ്ടി പോരാടുന്നവര്‍ക്ക് ഒരു പ്രചോദനമാണ്. ജീവിതത്തിലെ ഏറ്റവും മൂല്യമേറിയതിനെ എത്തിപ്പിടിക്കാന്‍ പ്രായവും കാലവും ഒരു തടസ്സമല്ല എന്ന് കാണിച്ചു തരുന്നു ഈ ചിത്രം.വിദ്യാധനം സര്‍വധനാല്‍ പ്രധാനം എന്ന ആശയം മുന്നോട്ടു വെക്കുന്ന ഈ ചിത്രം കുട്ടികള്‍ തീര്‍ച്ചയായും കണ്ടിരിക്കേണ്ട ഒരു ചിത്രമാണ്.
Ran (Film - Japan / France 1985) Writer & Director : Akira Kurosawa Genre : Action / Drama / War Language : Japanese Running Time : 162 minute.
ലോകം കണ്ട ഏറ്റവും മഹാനായ സംവിധായകൻ അകിര കുറൊസാവ 1985ൽ തിരക്കഥ എഴുതി സംവിധാനം ചെയ്ത ജാപ്പനീസ് സിനിമയാണ് റാൻ. വില്ല്യം ഷെക്സ്പ്പിയറുടെ King Lear എന്ന രചനയെ ആസ്പദമാക്കിയാണ് കുറൊസാവ ഈ മനോഹര ചിത്രം ഒരുക്കിയിരിക്കുന്നത്. സിനിമയുടെ ചരിത്രത്തിലെ തന്നെ ഏറ്റവും സ്വാധീക്കപ്പെടുകയും പ്രാധാന്യമർഹിക്കുകയും ചെയ്യുന്ന വ്യക്തിത്വമായി കുറൊസാവ പരക്കെ കണക്കാക്കപ്പെടുന്നു
ഇതൊരു ഇതിഹാസ കഥയാണ്. ഈ ഗണത്തിലെ കുറോസാവയുടെ അവസാന ചിത്രം കൂടിയാണ് റാൻ. ടോക്കിയോ അന്താരാഷ്‌ട്ര ചലച്ചിത്രോത്സവത്തിലാണ് ഈ ചിത്രം ആദ്യമായി പ്രദർശിപ്പിച്ചത്‌. മനോഹരമായ ദ്രിശ്യ ഭംഗിയും സാങ്കേതിക മികവും പശ്ചാത്തല സംഗീതവും എല്ലാം, കുറോസാവയുടെ സംവിധായക മികവിനൊപ്പം ഈ ചിത്രത്തെ ഒരവിസ്മരണീയ അനുഭവമാക്കി. അദ്ദേഹത്തിന്‍റെ Dersu Uzala എന്ന ചിത്രത്തെ കുറിച്ചുള്ള വിവരണം മുമ്പ്‌ പോസ്റ്റ്‌ ചെയ്തിരുന്നു.
A Masterpiece of War and Greed
അധികാരത്തോടുള്ള ആർത്തിയും ദുരാഗ്രഹങ്ങളും പ്രതികാരവും എല്ലാമാണ് ഈ സിനിമയുടെ പ്രധാന പ്രമേയം. ഇച്ചിമൊഞ്ചി എന്ന ഗോത്രത്തിന്‍റെ ദൈവ തുല്യനായ തലവനാണ് ഹിടെതോര. അദ്ദേഹത്തിനു ടാരോ, ജിരോ, സബൗരൊ എന്നീ മൂന്നു ആണ് മക്കളാണ് ഉള്ളത്. പ്രായാധിക്യം മൂലം ഹിടെതോര അധികാരം തന്‍റെ മക്കൾക്ക്‌ കൈമാറാൻ തീരുമാനിക്കുന്നു. ശേഷിക്കുന്ന കാലം എല്ലാ ബഹുമതികളോടും കൂടി പുത്രന്മാരോടും കുടുംബത്തിനോടുമൊപ്പം മാറിമാറി താമസിച്ചു മനസ്സമാധാനത്തോടെ മരിക്കണം എന്നതാണ് ഹിടെതോരയുടെ ആഗ്രഹം. മൂത്തവനായ ടാരോയെ ഗോത്രത്തിന്‍റെ അടുത്ത പരമാധികാരിയായി പ്രഖ്യാപിക്കുന്നു. ആയതിനാൽ പ്രധാന കൊട്ടാരവും വസ്തുവകകളും ടാരോക്കുള്ളതാണ്. മറ്റുള്ളവര്‍ക്ക് രണ്ടാമത്തെയും മൂന്നാമത്തെയും കൊട്ടാരങ്ങളുടെ ഉടമസ്ഥാവകാശം ലഭിക്കുന്നു. ഹിടെതോര രാജാവായി തന്നെ നില നില്‍ക്കുകയും ജിരോ, സബൗര എന്നിവർ ടാരോയുടെ പ്രധാന സഹായികളായി തുടരുകയും ചെയ്യും. ഇതിനെത്തുടർന്നുണ്ടാകുന്ന വാക്ക് തർക്കത്തിന്‍റെ പേരില്‍ ഇളയവനായ സബൗരയെയും ചങ്ങാതിയായ ടാങ്കോയെയും രാജാവ് പുറത്താക്കുന്നു. ഇവർക്ക്‌ സൈന്യാധിപതി ഫ്യുജിമാക്കി അഭയം നല്‍കുകയും മകളെ സബൗരക്കു വിവാഹം ചെയ്തു കൊടുക്കുകയും ചെയ്യുന്നു.
ടാരോയുടെ ഭാര്യ കയേതക്കു രാജാവിനോടുള്ള പൂർവ വൈരാഗ്യം വെച്ച് രാജ്യത്തെ പൂർണ്ണാധികാരവും രാജാവെന്ന പദവിയും ടാരോയിലേക്ക് എഴുതി വാങ്ങുന്നു. ക്ഷുഭിതനായ ഹിടെതോരയും പരിവാരങ്ങളും രണ്ടാമത്തെ മകൻ ജീരോയുടെ കൊട്ടാരത്തിലേക്ക് തിരിക്കുന്നു. ടാരോയുടെ സന്ദേശപ്രകാരം അച്ചനു മാത്രം കൊട്ടാരത്തിൽ താമസിക്കാമെന്ന ജീരോയുടെ നിർദേശം തള്ളിക്കളഞ്ഞു ഹിടെതോര കൂട്ടാളികളോടൊപ്പം അവിടെ നിന്നും പടിയിറങ്ങുന്നു. രാജ്യത്തെ ഭക്ഷ്യ ക്ഷാമം മൂലം അവർ ക്ഷീണിതരാകുമ്പോള്‍ സബൌരോയുടെ ചങ്ങാതി ടാങ്കോ അവരുടെ രക്ഷക്കെത്തുന്നു.
അധികാര ദുരാഗ്രഹം മൂത്ത യുദ്ധത്തിനൊടുവില്‍ ടാരോ കൊല്ലപ്പെടുന്നു. ജീരോ അധികാരം ഏറ്റെടുക്കുന്നു. സ്വന്തം ഭര്‍ത്താവിന്‍റെ ഘാതകനാണെന്നറിഞ്ഞിട്ടും ചേട്ടന്‍റെ ഭാര്യയായ കയേത അധികാരത്തിനു വേണ്ടി ജീരോയോടൊപ്പം കൂടുകയും, ജീരോയുടെ ഭാര്യയെ കൊലപ്പെടുത്തുന്നതിനുള്ള തന്ത്രങ്ങള്‍ മെനയുകയും ചെയ്യുന്നു. രാജ്യത്തിന്‍റെയും മക്കളുടെയും അവസ്ഥ ഹിടോതോരയെ ഭ്രാന്തമായ അവസ്ഥയില്‍ എത്തിക്കുന്നു. ടാങ്കോയുടെയും വിദൂഷകയുടെയുംതണലില്‍ ഹിടോതോര ഒളിവില്‍ താമസിക്കുന്നു. ടാങ്കോ സബൌരയെ വിവരങ്ങള്‍ ധരിപ്പിക്കാനായി പോകുന്നു. അച്ഛനേയും രാജ്യത്തിനേയും രക്ഷിക്കാന്‍ സബൌരയും കൂട്ടാളികളും മുന്നിട്ടിറങ്ങുന്നു.
അഭിനേതാക്കളുടെ അഭിനന്ദനീയമായ പ്രകടനം ഈ സിനിമയുടെ എടുത്തു പറയേണ്ട ഒരു ഘടകം ആണ്. ഇതില്‍ ഉപയോഗിച്ചിരിക്കുന്ന വസ്ത്രാലങ്കാരവും പശ്ചാത്തല സംഗീതവും എല്ലാം ഒരു ഐതിഹാസിക സിനിമക്ക് പാഠപുസ്തകമാണ്. സാങ്കേതിക വിഭാഗത്തിലെ ഒട്ടു മിക്ക പുരസ്കാരങ്ങള്‍ ആ കാലയളവില്‍ ഈ സിനിമ നേടിയെടുത്തു. കുറൊസാവ, മേഘങ്ങളെ ഒരു പ്രധാന ഘടകമായി ഈ സിനിമയില്‍ ഉപയോഗിച്ചിട്ടുണ്ട്. സമയ ക്രമങ്ങളുടെ മാറ്റം മാത്രമല്ല, ഓരോ രംഗത്തിന്‍റെയും ഭാവങ്ങള്‍ കൂടി നമ്മളെ കാണിച്ചു തരുന്നു മേഘങ്ങളുടെ വിവിധ രൂപത്തില്‍.
ലോക സിനിമയിലെ മഹത്തായ സൃഷ്ടികളെ ആസ്വദിക്കുന്ന ഓരോരുത്തരും തീര്‍ച്ചയായും കണ്ടിരിക്കേണ്ട ഒരു ചിത്രമാണ് ഇത്. പൂര്‍ണ്ണമായും ഒരു സംവിധായകന്റെ ചിത്രം.
The Rocket (Film - 2013 Australia) Director : Kim Mordaunt Genre : Drama Language : Lao Running Time : 96 minute
കിം മോഡന്‍റ് തിരക്കഥയും സംവിധാനവും നിർവ്വഹിച്ച് 2013ൽ ഇറങ്ങിയ ആസ്ട്രേലിയൻ ചിത്രമാണ് "ദി റോക്കെറ്റ്‌". ലോകത്തെവിടെയും, ഭരണകൂടത്തിന്‍റെ അവഗണനയുടെ പ്രധാന ഇര സാധാരണ ജനങ്ങൾ മാത്രമാണ്. അത്തരത്തിൽ ഒരു പുതിയ ഡാം നിർമ്മിക്കുന്നതിന്‍റെ ഭാഗമായി കുടിയിറക്കപ്പെട്ട വനവാസികളുടെ രാഷ്ട്രീയമാണ് അഹലോ എന്ന ബാലനിലൂടെ ഈ ചിത്രം മുന്നോട്ടു വെക്കുന്നത്.
ലാവോസ് എന്ന മനോഹര വനാന്തരത്തിൽ താമസിക്കുന്ന ഒരു ഗോത്രത്തെക്കുറിച്ചാണ് ഈ സിനിമ. അവരുടെ വിശ്വാസ രീതിയനുസരിച്ച് ഇരട്ടക്കുട്ടികളുണ്ടായാൽ ആദ്യത്തെ കുട്ടിയെ കൊല്ലണം. അല്ലെങ്കിൽ ആ കുട്ടി ആ കുടുംബത്തിനും ഗോത്രത്തിനും ശാപമാണ്. അവിടെ മാലി പ്രസവിക്കുന്ന ഇരട്ടക്കുട്ടികളിൽ ആദ്യത്തെ കുട്ടിയാണ് അഹലോ. എന്നാൽ പ്രസവത്തിൽ രണ്ടാമത്തെ കുട്ടി മരിച്ചതിനാൽ അഹലോയുടെ അമ്മ അവനെ കൊല്ലാൻ സമ്മതിക്കുന്നില്ല. അഹലോയുടെ അച്ചൻ പോലുമറിയാതെ രണ്ടാമത്തെ കുട്ടിയെ അമ്മയും മുത്തശ്ശിയും കൂടി കുഴിച്ചു മൂടുന്നു. വളരെ ചുറുചുറുക്കോടെ വളരുന്ന അഹലോയെ മുത്തശ്ശി എന്നും പേടിയോടെയാണ് കണ്ടിരുന്നത്‌.
അവരുടെ വാസസ്ഥലത്തിനു അടുത്തായി പുതിയൊരു ഡാം വരുന്നതിനാൽ അവിടെയുള്ള എല്ലാവരെയും മറ്റൊരു സ്ഥലത്തേക്ക് സർക്കാർ മാറ്റി താമസിപ്പിക്കുന്നു. ആ പാലായനത്തിനിടെ ഒരു അപകടത്തിൽ പെട്ട് അഹലോയുടെ അമ്മ മരണപ്പെടുന്നു. അഹലോയുടെ ജന്മമാണ് അതിനു കാരണമെന്ന് മുത്തശ്ശി അച്ഛനോട് വെളിപ്പെടുത്തുന്നു.
കൂടുതൽ സൗകര്യങ്ങൾ വാഗ്ദാനം ചെയ്തു സർക്കാർ നല്‍കിയ പുനരധിവാസ കേന്ദ്രം നരക തുല്യമായിരുന്നു. അവിടെ വെച്ച് അനാഥയായ കിയ എന്നൊരു കൂട്ടുകാരിയെ അഹലോക്ക് കിട്ടുന്നു. അവൾക്കൊരു അമ്മാവൻ മാത്രമേ ഉള്ളൂ. അവിടെ അഹലോ ചില പ്രശ്നങ്ങളിൽ ചെന്ന് ചാടുകയും, അഹലോക്കും അച്ഛനും മുത്തശ്ശിക്കും അവിടെ നിന്നും ഓടിപ്പോകേണ്ടതായും വരുന്നു. കിയയും അമ്മാവനും അവരോടൊപ്പം കൂടുന്നു. യാത്രക്കിടയിൽ റോക്കറ്റ് ഫെസ്റ്റിവൽ നടക്കുന്ന ഒരു ഗ്രാമത്തിൽ അവർ എത്തിപ്പെടുന്നു. മഴയ്ക്ക് വേണ്ടി, റോക്കറ്റ് നിർമ്മിച്ച്‌ വിക്ഷേപിക്കുന്ന ഒരു മത്സരമാണ് ഈ ഫെസ്റിവൽ. വലിയൊരു തുകയും വിജയികൾക്ക് ലഭിക്കും. അഹലോ അതിന്റെ ഭാഗമാകാൻ തയ്യാറെടുക്കുന്നു. അവന്‍റെ ജീവിതാവസ്ഥയും അനുഭവങ്ങളും പ്രകൃതിയുടെ ദാനങ്ങളും ഇഴ ചേർത്ത് അവൻ റോക്കെറ്റ്‌ നിർമ്മിക്കാൻ ആരംഭിക്കുന്നു. "ഭാഗ്യം കെട്ടവൻ" എന്ന പേരുദോഷം അവനു മാറ്റിയെടുക്കേണ്ടതുണ്ട്.
ഈ സിനിമ കാണാതെ പോകരുത്, അത്ര മേൽ ലളിതമായ ദ്രിശ്യ ഭാഷയും, മനോഹരമായ ദ്രിശ്യ ഭംഗിയും ഈ സിനിമ സമ്മാനിക്കുന്നുണ്ട്. അഹലോയുടെയും കിയയുടെയും അനായാസകരമായ അഭിനയത്തികവ് തന്നെയാണ് ഈ സിനിമയുടെ ഏറ്റവും വലിയ മുതൽക്കൂട്ട്. അന്ധ വിശ്വാസം ഈ സിനിമയുടെ ഒരു വിഷയം ആണെങ്കിലും അതിനെ നിരാകരിക്കാനോ ന്യായീകരിക്കാനോ അല്ല സംവിധായകൻ ശ്രമിക്കുന്നത്. മറിച്ച് ഓരോ മനുഷ്യനും നേരിടുന്ന പൊതുവായ രാഷ്ട്രീയം തന്നെയാണ്. കുടിയൊഴിപ്പിക്കപ്പെടുന്നവന്‍റെയും, ഭരണകൂട അവഗണനകൾ മറി കടന്നു കുതിച്ചുയരാൻ ശ്രമിക്കുന്നവന്‍റെയും രാഷ്ട്രീയം.
സംവിധായകന്റെ തന്നെ BOMB HARVEST എന്ന ഡോക്യുമെണ്ടറിയുടെ ചലച്ചിത്ര ഭാഷ്യമാണ് ഈ സിനിമ. 17-മത് കേരള ചലച്ചിത്രോത്സവത്തിൽ ഏറ്റവും അധികം ആളുകളെ ആഘർഷിച്ച ഒരു ചിത്രമായിരുന്നു ദി റോക്കറ്റ്. ആസ്ട്രേലിയൻ ചലച്ചിത്ര മേഖലക്ക് അഭിമാനപൂർവം ലോകത്തോട്‌ വിളിച്ചു പറയാവുന്ന ഒരു ചിത്രമാണിത്. പ്രദർശിപ്പിച്ച മേളകളിലെല്ലാം പ്രേക്ഷകരുടെ ഇഷ്ട്ട ചിത്രങ്ങളിലോന്നായിരുന്നു ദി റോക്കറ്റ്. ഒപ്പം ഒരുപാട് പുരസ്ക്കാരങ്ങളും ഈ ചിത്രം സ്വന്തമാക്കി.
കേരളത്തില്‍ അവഗണന അനുഭവിക്കേണ്ടി വരുന്ന ദളിതരുടെയും സ്ത്രീകളുടെയും പരിസ്ഥിയുടെയും ചെറുത്തു നില്‍പ്പിന്‍റെ കഥയാണ് ജയന്‍ കെ ചെറിയാന്‍ തിരക്കഥയെഴുതി സംവിധാനം ചെയ്ത "പാപിലിയോ ബുദ്ധ". ജീവിക്കാനുള്ള സ്വാതന്ത്രത്തിനു വേണ്ടി, സവര്‍ണ്ണ മേധാവികളോടും ഭരണ കൂടത്തിനോടും ദളിതര്‍ നടത്തുന്ന പ്രക്ഷോഭത്തിന്‍റെ മറ്റൊരു മുഖമാണ് ഈ സിനിമ. ദളിത്‌ സമൂഹം നേരിടുന്ന പ്രശ്നങ്ങളുടെ ശക്തമായ ഒരു ചലച്ചിത്രാവിഷ്കാരം.
പശ്ചിമ ഘട്ടത്തിലെ മേപ്പാറ എന്ന വനാതിര്‍ത്തിയില്‍, കുടിയൊഴിപ്പിക്കപ്പെട്ട ഒരു വിഭാഗം ജീവിക്കാനുള്ള ഭൂമിക്ക് വേണ്ടി സമരം നടത്തുന്നതാണ് സിനിമയുടെ കഥാ പശ്ചാത്തലം. കണ്ടല്‍ കറിയന്‍ എന്ന നേതാവാണ് സമരത്തിനു നേതൃത്വം നല്‍കുന്നത്. അദ്ദേഹത്തിന്‍റെ മകനാണ് Jawaharlaal Nehru University യില്‍ നിന്നും ബിരുദദാരിയായ ശങ്കരന്. ഇ എം എസ്സിനോടുള്ള ആരാധന മൂലമാണ് കരിയന്‍ മകന് ശങ്കരന് എന്ന പേരിട്ടത്. എന്നാല്‍ ശങ്കരന് തന്‍റെ ചുറ്റുപാടുകളെ കുറിച്ച് ബോധവാനാകാതെ, ജാക്ക് എന്ന സ്വവര്‍ഗാനുരാഗിയായ അമേരിക്കന്‍ സ്വദേശിയുടെ സഹായിയായി നടക്കുന്നു. ജാക്കിന് വേണ്ടി പശ്ചിമ ഘട്ടത്തിലെ പ്രത്യേക തരം പൂമ്പാറ്റകളെ പിടിച്ചു കൊടുക്കുന്നത് ശങ്കരനാണ്. പ്രത്യേകിച്ച് പാപിലിയോ ബുദ്ധ എന്ന അപൂര്‍വ്വയിനം പൂമ്പാറ്റകളെ.
തുല്യ നീതിക്ക് വേണ്ടിയുള്ള പോരാട്ടങ്ങളില്‍ കമ്യൂണിസവും പരാജയപ്പെട്ടതില്‍ നിരാശനായി കഴിയുന്ന ഒരു കമ്യൂണിസ്റ്റുകാരന്‍ കൂടിയാണ് ശങ്കരന്‍റെ അച്ചന്‍. ഈ സമരമുഖത്തെ ശക്തമായ സ്ത്രീ സാനിധ്യമാണ് മഞ്ജുശ്രീ എന്ന ദളിത്‌ യുവതി. ആണ് കോയ്മയുടെ സമൂഹത്തില്‍ അവര്‍ക്കിടയില്‍ നിന്ന് പൊരുതി സ്വന്തമായി ഓട്ടോറിക്ഷ ഓടിച്ചു ഊരിലെ കുട്ടികള്‍ക്ക് വിദ്യാഭ്യാസം നല്‍കുകയാണ് മഞ്ജുശ്രീ.
ഒരിക്കല്‍ അറസ്റ്റ്‌ ചെയ്യപ്പെടുന്ന ശങ്കരന് മേല്‍ മാവോയിസ്റ്റ്‌ ബന്ധം ആരോപിച്ചു പോലിസ്‌ ക്രൂരമായി മര്‍ദ്ദിക്കുന്നു. ജയില്‍ മോചിതനായ ശങ്കരന് തന്‍റെ വിഭാഗം അനുഭവിക്കുന്ന യാതനകളുടെ വ്യാപ്തിയും അതിലൂടെ പരിസ്ഥിതിയുടെ മേല്‍ ഭരണ കൂടം കടന്നാക്രമിക്കുന്നതും മനസ്സിലാക്കി പോരാട്ടത്തിനിറങ്ങുന്നു.
അയ്യങ്കാളിപ്പടയും ദളിത്‌ മനുഷ്യാവകാശ പ്രവര്‍ത്തനവും ദളിത്‌ സ്ത്രീ പീഠനങ്ങളും പറഞ്ഞു പോകുന്നുണ്ട് ഈ സിനിമ. ഒപ്പം ദളിതരുടെ പേരില്‍ നടത്തുന്ന ബുദ്ധി ജീവി-രാഷ്ട്രീയ-ഭരണകൂട കുതന്ത്രങ്ങളും. മഹാത്മ ഗാന്ധിയെ തരം താഴ്ത്തി കാണിച്ചു എന്ന പേരില്‍ ഒരുപാട് വിമര്‍ശനങ്ങള്‍ ഏറ്റു വാങ്ങേണ്ടി വന്നിട്ടുണ്ട് ഈ സിനിമ. ഒരു പ്രധാന സാമൂഹിക വിഷയം മുന്നോട്ടു വെക്കുമ്പോഴും വൈകാരികത കൂടുതലായി കടന്നു കൂടിയോ എന്ന് സംശയിക്കേണ്ടി വരുന്നുമുണ്ട് ചില ഭാഗങ്ങളില്‍. 17-മത് കേരള ചലച്ചിത്ര മേളയില്‍ അവസാന നിമിഷം പ്രദര്‍ശനാനുമതി നിഷേധിച്ചത് ഒരുപാട് പ്രതിഷേധങ്ങള്‍ക്ക് ഇടയാക്കി.
മറിമായം എന്ന ടെലിവിഷന്‍ പരിപാടിയിലൂടെയും മെമ്മറീസ് എന്ന സിനിമയിലൂടെയും ശ്രദ്ധേയനായ ശ്രീകുമാര്‍ ആണ് ഇതിലെ ശങ്കരന് എന്ന കഥ പാത്രത്തെ അവതരിപ്പിച്ചത്. ഈ ചിത്രം അവഗണിക്കുന്നതിലൂടെ കാണാതെ പോകുന്നത് ഈ അഭിനേതാവിന്‍റെ അര്‍പ്പണ മനോഭാവം കൂടിയാണ്. കേരളത്തിലെ പ്രമുഖ പരിസ്ഥിതി പ്രവര്‍ത്തകനായ കല്ലേന്‍ പോക്കൂടന്‍ ആണ് ശങ്കരന്‍റെ അച്ഛനായ നേതാവിന്റെ അവതരിപ്പിച്ചിരിക്കുന്നത്. മഞ്ജുശ്രീ എന്ന കഥാപാത്രത്തെ അവതരിപ്പിച്ച സരിത സുനില്‍ എന്ന നടിയുടെ അഭിനയവും എടുത്തു പറയേണ്ടത് തന്നെയാണ്. കൂടാതെ പദ്മപ്രിയയും നിര്‍മ്മാതാക്കള്‍ കൂടിയായ അശോക്‌ ബാരിയും തമ്പി ആന്‍റണിയും ഇതില്‍ അഭിനയിച്ചിട്ടുണ്ട്. മികച്ച ദ്രിശ്യ ഭംഗി ഒപ്പിയെടുത്ത എം.ജെ.രാധാകൃഷ്ണനും അഭിനന്ദനം അര്‍ഹിക്കുന്നു.
2012ലെ കേരള സംസ്ഥാന ചലച്ചിത്ര അവാര്‍ഡില്‍ സംവിധായകന് പ്രത്യേക ജ്യൂറി അവാര്‍ഡും മികച്ച നടി എന്ന നിലയില്‍ സരിത സുനിലിന് പ്രത്യേക ജ്യൂറി പരാമര്‍ശവും (അതിലും ഒരുപാട് ഏറെ അര്‍ഹിക്കുന്നുണ്ടെങ്കിലും) ലഭിക്കുകയുണ്ടായി. കൂടാതെ വിവിധ അന്താരാഷ്‌ട്ര ചലച്ചിത്രമേളകളില്‍ സാങ്കേതിക മികവിനടക്കം ഒരുപാട് ബഹുമതികള്‍ വാരിക്കൂട്ടി ഈ സിനിമ.
ഏറ്റവും വലിയ ജനാധിപത്യ രാജ്യത്ത് തുല്യ നീതി പരാജയപ്പെടുന്നതിനെ ചോദ്യം ചെയ്യുന്ന ഈ സിനിമ നമുക്ക് അഭിമാനത്തോടെ മുന്നോട്ടു വെക്കാം. സമൂഹത്തിനു നേരെ നമ്മള്‍ കണ്ണാടി തിരിക്കുമ്പോള്‍ കാണാതെ പോകുന്ന സത്യത്തിന്‍റെ വികൃതമായ മുഖത്തെ കാട്ടി തരുന്നു പാപ്പിലിയോ ബുദ്ധ.
-large-picture.jpg)
